Президент Садыр Жапаров "Кыргызстан менен Азербайжандын ортосундагы киреше салыгына кош салык салууну болтурбоо жана салык төлөөдөн баш тартуу менен салык салуудан качууну алдын алуу жөнүндө" макулдашууну ратификациялоо тууралуу" мыйзамга кол койду. Бул тууралуу өлкө башчынын маалымат кызматынан кабарлашты. Тиешелүү макулдашууга 24-апрелде Баку шаарында кол коюлуп, мыйзам өзү Жогорку Кеңеш тарабынан 23-октябрда кабыл алынган. "Макулдашуу кош салык салууну болтурбоо жана бир гана өлкөдө салык салуу боюнча кепилдиктерди берүү жолу менен чет өлкөлүк компанияларга биздин өлкөнүн экономикасынын ар кандай тармактарына инвестициялоо үчүн шарттарды түзөт", — деп жазылган маалыматта. Ошондой эле документ бир мамлекеттин резидентин экинчи тарапта дискриминациялык салык салуудан коргоо, салык салуулардан качууга же макулдашуунун жоболорун кыянаттык менен пайдаланууга жол бербөө максатын көздөй турганы белгиленди.
Министрлер кабинетинин төрагасы Акылбек Жапаров министрлер кабинетинин мүчөлөрү жана Президенттик администрациянын кызматкерлери үчүн жасалма интеллектти өнүктүрүү темасында уюштурулган лекцияны ачып жатып, "Дүйнөдө жасалма интеллектти улуттук өзгөчөлүктөрдү эске алуу менен ишке ашыра алган мамлекеттер келечектин лидери болуп жатканы азыртадан эле ачык байкалууда. Кыргызстан дагы ушундай лидер боло алат", — деп билдирди. Минкаб төрагасы жасалма интеллект жөн гана курал эмес, адамзат келечекти жаза турган жаңы тил экенин белгиледи.Акылбек Жапаров бүгүнкү күндө жасалма интеллект жаңы уникалдуу жумуш орундарын түзүүгө, жашоонун сапатын жакшыртууга жана ал тургай маданий мурастарды сактоого жардам берээрин улантып, ал жасалма интеллект функционалдык гана эмес, тилдин жана салттын кайра жаралуусунун символу боло аларын көрсөткөн “Акылай” долбоорун мисалга келтирди.
Кыргызстанда 10 айда жол эрежелерин бузуудан мамлекеттик бюджетке 525 млн 324 миң 955 сом өндүрүлдү. Бул тууралуу Жол кыймылынын коопсуздугун камсыздоо башкы башкармалыгынын 10 айдын жыйынтыгын чыгарган жыйынында белгилүү болду. Ведоствонун маалыматына ылайык, жыйын башкармалыктын башчысы Жеңишбек Жоробековдун төрагалыгы астында онлайн форматта өтүп, ага орун басарлары, ошондой эле жер-жерлердеги бөлүм башчылары катышты. Анда жыл башынан тартып жалпысынан 890 миң 461 жол эрежелерин бузган айдоочулар аныкталып, мамлекеттик бюджетке 525 млн 324 миң 955 сом өндүрүлгөнү айтылды. Бул көрсөткүч өткөн жылга салыштырмалуу 80 млн момго көп.Ар кандай жол эрежелерин бузгандыгы үчүн 85 миң 400 авто унаа убактылуу айып короо жайына токтотулган. Ыкчам кеңешменин жүрүшүндө ЖКККББнын жетекчилиги тарабынан жер-жерлердеги бөлүмдөрдүн жетекчилерине жол-унаа кырсыктарынын алдын алуу багытында тийиштүү тапшырмалар коюулуп, айрыкча жаш өспүрүмдөрдүн коопсуздугуна көңүл буруу эскертилди.
Өлкөнүн динамикалык өнүгүүсү үчүн жана чыңалган демографиялык абалдан улам Россия эмгек мигранттарына муктаж, алардын келишин кубаттайт. Бул туурасында РФ президентинин маалымат катчысы Дмитрий Песков айтканын РИА Новости жазды.Анын айтымында, мигранттарды кабыл алган башка өлкөлөрдөй эле эрежелерди жөнгө салып, иретке келтириш керек.