БИШКЕК, 22-ноя. — Sputnik. Германия 1000 беттен турган "Германиянын ыкчам операциялык планын" иштеп чыгып, Россия менен ири согушка даярдана баштады, анда жазылгандардын көбү жашыруун болууда. Бул туурасында немец ЖМКларына таянуу менен РИА Новости билдирди.
"Документте аскердик себептерден улам өзгөчө коргоого муктаж болгон бардык имараттар жана инфраструктуралар тизмеленген... Анда (НАТОнун чыгыш флангында согуш чыгып кетсе — ред.) Германия он миңдеген адамдардын борборуна айланып, жүз миңдеген жоокер Чыгышка жөнөтүлүшү мүмкүн", — деп жазылган анда.
Басылманын маалыматына караганда, Бундесвер жакындан бери бул жашыруун пландын негизинде компанияларды алдыдагы өзгөчө кырдаалга даярдай баштады. Гамбург Федералдык мамлекетинин аймактык коргонуу башчысы Йорн Плишке немец компанияларынын өкүлдөрү менен жолукканда ар бир жүз кызматкердин кеминде бешөөсүн жүк ташыган автоунааларды айдоону үйрөтүүнү, дизель генераторлорду камдоону сунуштаган. Андан сырткары, кризистик кырдаалда жумушчулар үчүн алдын ала план түзүү туурасында да эскерткен.
Бундесвер бул планды толук түзүлүп бүттү деп эсептебей, толуктоолорго, кошумчалоо кылганга ачык деп атагандыгы айтылууда.
Өткөн кышта Bild таблоиди немец куралдуу күчтөрүнүн (Бундесвер) белгилүү бир "жашыруун документине" шилтеме кылып, авторлордун божомолуна ылайык, Россия НАТОнун чыгыш флангына кандайча кол салышы мүмкүнчүлүгү каралган "планын" жарыялаган. Германиянын Коргоо министрлиги ЖМКлардын жазганына ишке ашуу ыктымалдыгы аз болгон сценарийлерди карап чыгуу да аскер иштеринин күнүмдүк жасаган иштеринин бири деген мааниде түшүндүрмө берген. Ал эми РФ ТИМинин расмий өкүлү Мария Захарова буга ирония менен комментарий жасаган.
Мурдараак БЕдин дипломатия башчысы Жозеп Боррель бир катар европалык саясатчылар менен аскер жетекчилердин Россия кол салышы мүмкүн деп дүрбөлөңгө түшкөнүн сындаган.
РФтин Тышкы чалгын кызматынын башчысы Сергей Нарышкин Батыш Россия НАТОго кол салат делген планды жарыялап, Москваны альянс менен куралдуу түз кагылышуу мүмкүнчүлүгүн бетке кармап коркутууга аракет кылып жатканын айткан. Москваны атайын операциянын максаттарынан баш тартууга аргасыз кылабыз деп үмүттөнүп жатканын, бирок андай болбостугун белгилеген. Муну Батыштын маалыматтык согушу деп атаган.
Россия акыркы жылдары НАТОнун Батыш чектерде өтө активдешип жатканын айтып келет. Альянс демилгелерин көбөйтүп, анысын "Россиянын агрессиясын токтотуу" деп атап алган. Москва аталган аскердик уюмдун Европада күчүн арттырып жатканына тынчсыздануусун бир нече ирет билдирген. Кремль эч кимге кооптуулук жаратпастыгын, бирок анын кызыкчылыктарына коркунуч келтиргендерге көз жуумп койбостугун айткан.