Жогорку Кеңештин мурдагы депутаты Канат Исаев кармалды. Бул тууралуу анын адвокаты Бакыт Осмоналиев билдирди. Маалыматка ылайык, Канат Исаев УКМК тарабынан 20-ноябрда кармалган. Саясатчынын баш коргоо чарасы бүгүн тандалары күтүлүүдө. Исаевдин эмнеге айыпталып жатканы азырынча белгисиз. Эске салсак, буга чейин 2017-жылы Канат Исаевге бийликти күч колдонуп басып алуу боюнча иштин фигуранты катары кылмыш иши козголуп, 2019-жылы апрелде сотко чейинки өндүрүш токтотулган.
Бишкекте мектеп окуучуларына айына 200 миң сомго чейин айлык алган кесиптер көрсөтүлдү. Бул тууралуу Эмгек, социалдык камсыздоо жана миграция министрлигинен билдиришти. Маалыматка ылайык, 9-класстын окуучулары үчүн кесипке багыт берүүчү экскурсия өттү. Анын алкагында балдар тигүү өндүрүшүнө барып, андагы шарттар, жеңил өнөр жай тармагындагы кесиптер менен таанышып, жумушка орношуунун жол-жобосу тууралуу билишти.Ишкананын директорунун орун басары Бектур Кубанычбеков мындай экскурсиялар жумуш орундарындагы адистерге коюлган талаптар менен таанышууга мүмкүндүк берерин белгилеген. "Баары юрист, экономист болом деп жатышат, алардын айлыгы 40 миң сом. Бизде дизайнерлер, конструкторлор бар, минималдуу айлыгы 90 миң сомдон 200 миң сомго чейин. Сатуу боюнча менеджер бар. Мисалы, 10 миллион сомго чейин буйрутма түшсө, ал 1 пайызын алат, башкача айтканда, айлыгы 100 миң сомду түзөт. Кадр маселеси биз үчүн өтө маанилүү, Беларустан дизайнер алууга аргасыз болдук. Жергиликтүү адистерди жалдасак жакшы болмок", — деди Кубанычбеков. Эмгек министри Жылдыз Полотова бир гана жогорку окуу жайды эмес, кесиптик лицейлерди жана колледждерди аяктагандан кийин деле жакшы жумуш тапса болорун айтып өттү.
Бишкектин түндүк бөлүгүндө суу убактылуу өчүрүлдү. Бул тууралуу Бишкек мэриясынан кабарлашты. Маалыматка ылайык, Шабдан Баатыр менен 7-Апрель көчөлөрүнүн кесилишиндеги суу өтүүчү түтүк жарылган. Мындан улам суу убактылуу өчүрүлдү. калаанын бийлигинин билдируусундо “Бишкексууканал” жеринде иштеп жатканы айтылып, келтирилген ыңгайсыздыктар үчүн шаардыктардан кечирим сураган кайрылуу жазылган.
Россиянын жаңы сыноодон өткөн "Орешник" ракетасын атып түшүрүү өтө оор болот. Бул тууралуу АКШнын стратегиялык жана эл аралык изилдөөлөр институтунун ракетага каршы коргонуу долбоорунун директору Том Карако айтканын РИА Новости жазды. "Андан коргонуу өтө татаал", — деп эскерткен эксперт. Караконун айтымында, ракетанын алды жагы индивидуалдуу багыттоо жана бутаны жок кылуучу жогорку ылдамдыктагы бөлүгү болуп эки блоктон турат, мындай техниканы жок кылуу — "баш оорута турган чоң көйгөй". Бейшемби күнү Россия президенти Владимир Путин атайын аскердик операциянын жүрүшү боюнча билдирүү жасап, орто аралыкка атылуучу "Орешник" жаңы ракетасы ийгиликтүү сыналганын билдирген. Путин бул Украина Куралдуу күчтөрүнүн америкалык жана британиялык алыска атылуучу куралдарды колдонуусуна жооп экенин белгиледи. Анын айтымында, россиялык аскерлер Украинанын коргонуу өнөр жайы комплексинин бир объектисине сокку уруп, натыйжада Днепропетровскиде ракеталык техника өндүргөн комплекс кыйраган.