БИШКЕК, 21-ноя. — Sputnik. Президент Садыр Жапаров "1954-жылдын 14-майында Гаага шаарында кол коюлган Куралдуу жаңжал болгон учурда маданий дөөлөттөрдү коргоо жөнүндө конвенциянын протоколуна Кыргыз Республикасынын кошулуусу жөнүндө" мыйзамына кол койду. Бул тууралуу өлкөнүн маалымат кызматы кабарлады.
Мыйзам 23-октябрда Жогорку Кеңеш тарабынан кабыл алынган.
Маалыматта мыйзамдын максаты дүйнөлүк маанидеги маданий дөөлөттөрдү сактоо жана коргоо, жок кылууну болтурбоо жана уурдоого каршы күрөшүү, ошондой эле дүйнөлүк маданий баалуулуктарды коргоо боюнча интеграциялык процесстерге колдоо көрсөткөн өлкө катары Кыргызстандын эл аралык имиджин түзүү болуп саналары айтылат.
Конвенциясынын протоколу Гаага конвенциясы сыяктуу эле 1954-жылдын 14-майында кабыл алынган. Учурда ага 113 өлкө, КМШдан Россия, Украина, Беларусь, Азербайжан, Молдова, Армения, Тажикстан, Түркмөнстан, Казакстан кошулган.
Азыркы учурда Кыргызстанда тарыхый, археологиялык, архитектуралык жана шаар куруу, монументалдык искусствонун 1500дөн ашык кыймылсыз эстеликтери жайгашкан. Ошондой эле баалуу экспонаттарды камтыган мамлекеттик 68 музей бар.
Бул Конвенциянын протоколуна кошулуу республиканын маданий дараметин эл аралык аренада натыйжалуу пайдаланууга мүмкүндүк берип, тышкы саясаттын маселелерин чечүүгө шарт түзөт.