БИШКЕК, 20-ноя. — Sputnik. Түркия президенти Режеп Тайип Эрдоган Украинанын алыска атылуучу ракеталарды колдонушу өзөктүк чыр-чатактын чыгуу кооптуулугун күчөтөрүн айтты. Өлкө лидери бул тууралу Бразилияда өткөн G20 саммитинин жыйынтыгы менен өткөн маалымат жыйында билдиргенин РИА Новости жазды.
"Өзөктүк курал пайдаланылган жаңжал эч кимге пайда алып келбейт. Украина колдонуп жаткан ракеталар кырдаал эмнеге кептей турганын көрсөттү. Мындай терс жагдайларга каршы позициябызды сактоо менен тараптар тынчтыкка келүүгө ыктайт деп ишенебиз. Биз тынчтыкты камсыздоо боюнча чараларды көрө беребиз", — деди Эрдоган маалымат жыйында.
Президент, мындан тышкары, Россиянын жаңыланган өзөктүк доктринасына да көңүл бурду. Анын айтымында, бул — Москванын НАТОнун аракеттерине жооп чарасы.
"Доктрина — биринчи кезекте Россиянын өзүнө каршы жасалган аракеттерге жооп иретиндеги кадамы. Документ НАТОнун расмий адамдары тарабынан каралышы керек, — деди Эрдоган.
Эскерте кетсек, New York Times гезити америкалык администрациядагы кызматкерлерге таянуу менен АКШ президенти Жо Байден Украинага Россиянын тереңине сокку уруу үчүн ыраакка атылуучу ракеталарды колдонууга уруксат бергенин жазган. Маалымат бергендердин айтымында, биринчи соккулар ATACMS ракеталары менен жасалмак. ЕБ дипломатиясынын башчысы Жозеп Боррель аталган курал менен 300 чакырым радиус аралыкка сокку урууга болорун тастыктаган.
Ал арада украиналык ЖМКлар кечээ өлкөнүн Куралдуу күчтөрү ATACMS баллистикалык ракеталары менен Россиянын аймагына сокку урганын жазып чыгышты. Бирок Генштаб бул маалыматты тастыктаган эмес.
Анткен менен G20 саммитине россиялык делегацияны жетектеп барган РФ ТИМинин жетекчиси Сергей Лавров ATACMS ракеталары менен Брянск облусуна сокку урулганын, бул АКШнын кырдаалды курчутууга ниети күч экенин көрсөтөрүн айтты.
Белгилей кетсек, Украина Куралдуу күчтөрү ATACMS ракетасы менен Брянскидеги объектилерге алты ирет чабуул жасаганы белгиленген. С-400 жана "Панцирь" системалары беш ракетаны атып түшүрүп, алтынчысын жарактан чыгарган. Жабыркагандар жана кыйроолор катталган эмес.