БИШКЕК, 20-ноя. — Sputnik. АКШнын президенти Жозеф Байден Украинага жөө аскерлерге каршы мина жөнөтүүгө уруксат берди. Бул туурасында Washington Post өзүнүн маалымат булактарына таянып жазды.
"Байдендин жөө аскерлерге каршы колдонулуучу миналарды Украинага жөнөтүүгө уруксат кылганын америкалык эки аткаминер тастыктады", — деп жазылган макалада.
Гезиттин билдиргенине караганда, Ак үй муну россиялык аскерлердин чабуулун токтотуу үчүн жасап жатат. Украиналык аткаминерлер аны калк жыш жайгашкан райондорго жакындатпоого убада бергени менен аскерий эксперттер башка пикирде. Алар аталган курал жай жарандар үчүн баары бир кооптуу экенин белгилеп жатышат.
Белгилей кетсек, The New York Times атын атабаган америкалык аткаминерлерге таянып, Байден Украинага алыска атылуучу ATACMS ракеталары менен Россиянын түпкүрүнө сокку урууга уруксат бергенин кабарлаган.
Россиянын Коргоо министрлиги Украинанын Куралдуу күчтөрү Брянск облусундагы объектиге түндө алты ATACMS менен чабуул жасаганын билдирди. С-400 жана "Панцирь" абадан коргонуу системасынын экипаждары беш ракетаны атып түшүрүп, алтынчы ракетасын жабыркатышкан. Аскердик объектинин техникалык аймагына снаряддын сыныктары түшүп, өрт чыккан. Жалын тез арада өчүрүлгөн.
Россия Украинага Батыштын курал-жарак берүүсү кырдаалды жөнгө салбастыгын жана НАТО өлкөлөрүн чатакка катыштырып, "от менен ойноо" болуп жатканын айтып келет. РФ ТИМинин жетекчиси Сергей Лавров Украинага делген жүктүн бардык түрү Россия үчүн мыйзамдуу бутага айланарын эскерткен. Анын айтымында, АКШ менен НАТО согушка курал-жарак берип эле катышпастан, Улуу Британиянын, Германиянын, Италиянын жана башка өлкөлөрдүн аймактарында аскердик кадрларды даярдап берип да көмөктөшүүдө.
Кремль Батыштын Киевди курал-жарак менен жабдуусу орус-украин сүйлөшүүлөрүн улам артка тартып, кесепети тиерин да бир нече ирет белгилеген.