БИШКЕК, 19-ноя. — Sputnik. Бишкектин Чыгыш-5 кичи районундагы 948 миллион сомго бааланган бала бакча мамлекеттин балансына өткөрүлдү. Бул тууралуу УКМК билдирди.
© Фото / пресс-служба ГКНБ КР
Маалыматка караганда, бакча мурда Фрунзедеги "СССРдин 50 жылдыгы" аталышындагы электрондук эсептөөчү машиналар заводунун балансында турган. Аянты 2 800 чарчы метр болсо, жанаша жайгашкан жери бир гектардан ашкан.
"Бала бакча 1993-жылы социалдык объектилерди ээликтен ажыратууга тыюу салган ченемдик-укуктук актыларды бузуу менен "Ж" ААКсына жеке менчикке өткөрүп берилген. Ал эми 1999-жылы Б.К. аттуу жаранга сатылган, ал 2009-жылы белекке берүү келишими аркылуу өзүнүн жакын туугандарына өткөргөн", — деп айтылат маалыматта.
УКМК көрүлгөн чаралардын натыйжасында бала бакчанын менчик ээлери бул социалдык мүлккө ээлик кылуунун мыйзамсыздыгын түшүнүп, өз ыктыяры менен кайтарып беришкенин кошумчалады.