БИШКЕК, 18-ноя. — Sputnik. Бакуда БУУнун Климаттын өзгөрүшүнүн алкактык конвенциясынын (COP29) тараптарынын 29-конференциясынын алкагында Кыргызстан башка өлкөлөр менен отун-энергетика жаатында кызматташууну улантууга негиз салган бир нече документке кол койду. Бул туурасында энергетика министри Таалайбек Ибраев Sputnik Ближнее зарубежье Telegram каналына айтып берген.
Россия жана Кыргызстан республиканы 2040-жылга чейин газ менен камсыздоону макулдашкан.
"Эки жылда көгүлтүр отту сатып алуунун көлөмүн 800 миллион куб метрге жеткиребиз", — деген министр.
Ибраев инфраструктуралардын газды өткөрүүсү боюнча көйгөйлөр бар экендигин белгилеп, бирок ал чечиле турган маселе экендигин кошумчалаган.
2022-жылы өлкө 387 миллион куб көгүлтүр от сатып алган. Бирок бул продукцияны пайдалануу экономиканын, калктын санынын жана ЖЭБдердин көмүрдөн газга өтүшүнө байланыштуу күн сайын өсүп жатат.
Отун-энергетика жаатындагы дагы бир макулдашуулар Азербайжан менен түзүлгөн. Аткаминердин маалыматында, булардын ичинен эң маанилүүсү "2024-2025-жылдары энергетика жаатында кызматташуу боюнча жол картасы" болгон.
"Бул макулдашуулар нефть, газ жана кайра жаралуучу энергия тармактарындагы өз ара кызматташуу жаатында болду. Андан сырткары, биргелешкен жумушчу топторду түзүү каралды", — деген Ибраев.