БИШКЕК, 17-ноя. — Sputnik. Украинанын жеңилиши Трамптын алдыдагы президенттик кызматында кадыр-баркына доо кетирет. Ошондуктан АКШнын азыркы президенти Жо Байдендин администрациясы Киевди активдүү колдоону пландоодо. Мындай пикирин Чикаго университетинин профессору Жон Миршаймер Duran YouTube-каналына курган маегинде айтканын РИА Новости жазды.
"Трамп үчүн Украинанын ал кызматка киришкенге чейин жеңилгени жакшы. Эгерде президент болуп иштеп баштагандан кийин жеңилсе, анда аны бул үчүн айыпташат. Байдендин администрациясы учурда дал ушундай жагдай жаралышы үчүн Украинаны 20-январга чейин эптеп жеңилүүдөн сактап туруу үчүн болгон аракетин көрүүдө", — деп билдирген саясат таануучу.
Эксперттин пикиринде, Трамп Москванын Киевдин толугу менен найтралдуу болушу, жаңы аймактар менен Крымды Россиянын карамагына алуу боюнча негизги шарттарын кабыл алгысы келбегендиктен жаңжалды оңунан чече албайт. Миршаймер көйгөйдү Трамптын администрациясындагылар, бири-бири менен атаандашкан саясатчылар да курчутат деген оюн кошумчалаган.
"Мен баары согуш талаасында чечилет деп ойлойм. Акыры жакынкы келечекте жаңжалдын убактылуу токтошуна күбө болобуз", — деген Миршаймер.
Мурдараак Ак үйдүн башчысынын кеңешчиси Жейк Салливан Байден президенттиктен кеткенге чейин конгресстен Украинаны колдоо үчүн кошумча каражат алууну өтүнөрүн билдирген. Анын айтымында, кызматтан кетип жаткан администрация Вашингтон Киевге 2025-жылга дагы акча бөлүүнү туура көрөт.
Трамп буга чейин Ак үйдүн Украина боюнча иштерин сындап келген. Ал эми Зеленскийди Вашингтонго келген сайын миллиарддаган акчаларды алып кеткен "соодагер" деп атаган. Ошондой эле Ураинадагы согушту сүйлөшүү жолу менен жөнгө салууга кудурети жетерин, ал тургай муну бир сутка ичинде чече аларын айткан. Кремль бул оңой-олтоң чечип коё турганжеңил маселе эмес экенин белгилеген.
Июнь айынын ортосунда Путин Украинадагы согушту жөнгө салуу боюнча жаңы сунуштарын айткан. Анда Крым, ДЭР, ЛЭР, Херсон жана Запорожье облустары Россиянын аймактары деп таанылуусу каралган. Ошондой эле Украинанын блоктон тышкаркы жана өзөктүк куралсыз макамын бекитүү, Россияга каршы чектөөлөрдүн алынышы камтылган. Өлкө лидери бул демилге согушту токтотуп, аны саясий-дипломатиялык формада жөнгө салууга өбөлгө болорун айткан.
Бирок Украинанын Куралдуу күчтөрү Курск облусуна кол салгандан кийин Путин карапайым элге, жарандык инфраструктурага сокку уруп, атомдук энергетикалык объектилерге коркунуч жараткандар менен сүйлөшүү мүмкүн эмес деп билдирген. Кийинчерээк президенттин жардамчысы Юрий Ушаков Москванын тынчтыкты орнотуу боюнча сунуштары жокко чыкпаганын, бирок бул этапта Москва Киев менен сүйлөшүүлөргө барбай турганын айткан.