Президент Садыр Жапаров бүгүн, 17-ноябрда, Бишкек шаардык кеңешинин депутаттарын шайлоодо №1046 участогунда добуш берди. Бул тууралуу өлкө башчынын маалымат кызматы кабарлады. Добуш берүүдөн кийин президент элге кайрылып, өлкөдөгү шайлоо системасы кыйла оңолуп, ачык-айкын болуп калганын белгиледи. Ошондой эле Мамлекет башчысы жарандарды шайлоого активдүү катышууга чакырып, 18 жаштан 100 жашка чейинки ар бир адам добуш берүүгө укуктуу экенин эске салды.
Шаарларды өнүктүрүү боюнча президенттин демилгесинин алкагында Кара-Балтага бөлүнгөн бир миллиард сом калаанын өнүгүүсүнө орчундуу таасир этти. Бул тууралуу Кара-Балтанын мэри Мирлан Джекшенов Sputnik Кыргызстан радиосунун эфиринде маек куруп жатып билдирди. Анын айтымында, шаарда жакынкы 3-4 жылдын ичинде чоң өзгөрүү күтүлүүдө. "Жакынкы 3-4 жылдын ичинде Кара-Балтада чоң өзгөрүү болот. Быйыл башталды. Жылдан-жылга бюджетибиз көбөйөт. Суу, свет, жол маселелерин чечебиз. Муну менен катар бала бакча, мектеп көйгөйлөрү дагы чечилет. Кара-Балта шаары жакынкы жылдары республикалык деңгээлдеги алдыңкы шаарлардын бири болот", — деди Джекшенов. Ошондой эле ал шаарда өндүрүш ишканаларын жандандырууга өзгөчө көңүл бурулуп жатканын кошумчалады.
Бүгүн Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Кудайбеген Базарбаев жергиликтүү кеңештердин депутаттарын шайлоого мониторинг жүргүзгөн индиялык байкоочулар Бидхан Чандра Патра жана Уса Джен Мог менен жолукту. Мекемеден билдиришкендей, жолугушуунун жүрүшүндө Кудайберген Базарбаев президент Садыр Жапаровдун “Административдик-аймактык реформа жүргүзүү жөнүндө” жарлыгынын негизинде жергиликтүү жана шаардык кеңештерге эң масштабдуу шайлоо өтүп жатканын белгилеп, шайлоону эл аралык стандарттарга ылайык өткөрүү үчүн бардык шарттар түзүлгөнүн белгиледи. Индиялык эл аралык байкоочулар Бидхан Чандра Патр жана Уса Джен Мог да өлкөдө өтүп жаткан жергиликтүү кеңештердин шайлоосу эл аралык стандарттарга шайкеш өткөрүү зарылчылыгын билдиришти. Соңунда эл аралык байкоочулар жергиликтүү кеңештерге шайлоолорду өткөрүүдө ийгилик каалашты.
Киев тез аранын ичинде Владимир Зеленскийдин АКШдагы президенттик шайлоого жеңишке жетишкен Дональд Трамп менен жолугушуусун өткөрүүнү суранып жатат. Бул тууралуу немецтик Welt гезити Украинанын бийликке жакын адамдарына таянуу менен жазды. "Украинада Трампты Киевге ыктатуу, анын Зеленский менен жолугушуусун уюштуруу аракеттери катуу көрүлүүдө", — деп жазылган макалада. Авторлор киев режими Трамптын тынчтык пландарынын деталдары ЖМКларга чыгып жатканына дыкат көңүл буруп турганын белгилешкен. Украина жетекчилиги АКШнын эртеңки президентинин бардык талабына макул болууга аргасыз болуп каларынан чочулап турары жазылган. Мындан тышкары, журналисттердин пикиринде бийлик алмашкандан кийин Москва менен Вашингтондун болжолдонгон макулдашуусу Владимир Зеленскийдин мындан аркы тагдырын аныктайт. Эгер тынчтык процессинин жыйынтыгы Украинага 2022-жылы сунушталган шарттан начарыраак болуп калса, Зеленскийдин саясий карьерасына чекит коюлары айтылды.