Бишкекте эл аралык байкоочулар үчүн жергиликтүү кеңештердин депутаттарын шайлоонун өзгөчөлүктөрү тааныштырылды. Иш-чаранын жүрүшүндө Борбордук шайлоо комиссиясынын төрайымы Нуржан Шайлдабекова бүгүн айрым категориядагы жарандар үчүн сырттан добуш берүү жүрүп жатканын белгиледи. "Кыргызстанда 10 жылдан бери шайлоо реформасы жүрүп жатат. 2015-жылдагы парламенттик шайлоодон бери өлкөдө шайлоочуларды жана алардын добуштарын бурмалоонун жана эсепке алуунун ар кандай түрлөрүн жоюуга багытталган таптакыр жаңы шайлоо модели колдонулууда. Бул модель биринчи колдонуудан эле өзүн ийгиликтүү далилдеди жана бүгүнкү күндө биз көп кырдуу шайлоо процессинин алкагында башка көйгөйлөрдү акырындап чечип жатабыз. Бул шайлоо жакында мыйзамда бекитилген административдик-аймактык реформадан улам өтүп жатат", - деди ал. Анын айтымында, реформанын натыйжасында 484 айыл аймактын ордуна 264 түзүлдү, булар 33 шаар жана 231 айыл аймагы болуп саналат.
Ички иштер министрлигинин Жол коопсуздугун камсыздоо башкы башкармалыгы жарандарды чет өлкөлүк номурлуу унааларды сатып алууда сак болууга чакырды. Мекеменин билдирүүсүндө соңку учурда Армения, Абхазия жана Россиядан унааларды тетик катары Кыргызстанга алып келип, бул жактан чогултуп унаа катары саткан учурлар бар экени айтылат. Мындайда унаалар чек арадан, бажыдан каттоодон өтпөй, транспорт каражатын каттоо жөнүндө күбөлүктөрү чет өлкөдөн жасалып турганы да жазылган. Ушуга байланыштуу Ички иштер министрлиги чет өлкөлүк номурлуу унааларды иретке келтирүү максатында Салык кызматы жана Унаа мамлекеттик агенттиги менен иш-мерчем түзүп, жакынкы күндөрү рейддер башталарын эскертти.
Жамааттык коопсуздук келишим уюмунун Парламенттик ассамблеясынын төрагасы, Мамлекеттик Думанын төрагасы Вячеслав Володин Парламенттик ассамблеясынын 18 жылдык мааракеси менен куттуктады. Ал белгилегендей, ассамблея мыйзам чыгаруу тажрыйбасы менен бөлүшүү жана аскердик-саясий кырдаалга парламенттик мониторинг жүргүзүү үчүн маанилүү институт болуп калды. “Жаңы геосаясий чакырыктар жана эл аралык коопсуздук тутуму бузулуп жаткан маалда парламентарийлердин конструктивдүү диалогу жана биздин позицияларыбыздын дал келиши өзгөчө мааниге ээ. Коопсуздукту чыңдоо үчүн күн сайын укуктук негиз түзүп жаткан ЖККУнун парламенттериндеги бардык кесиптештерибизге ыраазычылык билдирем”, — деп айтылат куттуктоодо. Володин айткандай, ассамблеянын бардык аракеттери ЖККУ өлкөлөрүндө тынчтыкка жана стабилдүүлүккө жетишүүгө багытталган.
АКШнын Арлингтон шаарында 16-ноябрага караган түнү бокс боюнча дүйнөнүн мурдагы чемпиону, 58 жаштагы Майк Тайсон менен белгилүү блогер, 27 жаштагы Жейк Полдун беттеши өттү. Кармаш эки мүнөттүк сегиз раунддан турду. Калыстар тобу 79-73 эсебинде жеңишти Жейк Полго ыйгарышкан. Майк Тайсон бокстагы карьерасын 1985-жылы баштап, 59 беттеш өткөргөн. Анын ичинен 50 жолу жеңишке жетсе, 44үн нокаут менен, жети жолу жеңилүү ызасын тарткан, эки беттеш жараксыз деп табылган. Жейк Пол 11 ирет жеңип, бир жолу жеңилген.