БИШКЕК, 15-ноя. — Sputnik. "Евразия" тармактык университети Россиянын жана КМШ өлкөлөрүнүн жаштарын "Евразиялык маданий коддор — ийгиликтүү бизнес-идеянын негизги принциби" аттуу алгачкы билим берүү курсун акысыз окууга чакырат.
Бүтүрүүчүлөргө Москва мамлекеттик эл аралык мамилелер институтунун сертификаттары, россиялык ири компанияларда такшалуу мүмкүнчүлүгү жана "Евразия" автономдуу коммерциялык эмес уюмунун бизнес-идеяларын ишке ашыруу үчүн гранттар берилет.
Россиянын Мамлекеттик Думасынын төрагасынын орун басары жана университеттин илимий жетекчиси Борис Чернышов "Евразия" университети үчүн социалдык компонент өзгөчө маанилүү экенин белгиледи.
"Бул — толугу менен эле элдик демилге. Бүгүнкү күндө бизнесмендер жеке гана эмес, өз өлкөлөрүнүн жыргалчылыгы үчүн да ийгиликке умтулушат. Дал ушундай мамиле Евразиянын билим берүү программаларынын негизин түзөт. Биздин максат – коомдук жыргалчылык менен салттуу баалуулуктарды урматтаган патриот бизнесмендерди тарбиялоо", — деди Чернышов.
Өзгөчө бизнес-идеясы бар 18-35 жаштагы адамдар "Евразия" университетинин студенттери боло алышат. Университет жол кире, жатакана жана тамак-ашка кеткен чыгымдарды төлөйт. Жыл сайын төрт мектеп (курстар) өткөрүлөт, алардын ар бири 100-150 адамды окутууну камтыйт.
Арыздар "Евразия" университетинин сайтында кабыл алынат.