Добуштарды сатып алуунун кереги жок, деди Улуттук коопсуздук мамлекеттик комитетинин төрагасы Камчыбек Ташиев бүгүн Жогорку Кеңеште республикалык бюджетти кароо учурунда. Ал белгилегендей, мамлекет тарабынан шайлоону ачык өткөрүү үчүн бардык шарттар түзүлгөн. "Мен бардыгына, анын ичинде мамлекеттик кызматкерлерге кайрылат элем, эгер кайсы бир партияга үгүт иштерин жүргүзсөңөр жоопкерчиликке тартыласыңар. Каалаганыңызга добуш бериңиз, бирок үгүт жүргүзбөңүз. Мындан ары парламенттик болобу, президенттик болобу бардык шайлоолор ушундай болот. Эл шайлаган адам болот. Буга чейин шайлоо кандай болгонун билесиңер, бардыгына көз жумуп коюшчу, азыр андай кыла албайбыз. Ким болбосун, баарын жоопко тартабыз", - деди ал. Белгилей кетсек, 17-ноябрда Кыргызстанда жергиликтүү кеңештерге депутаттарды шайлоо өтөт.**Кийинки жылы Бишкекте жети көчө оңдолуп, үч жаңы жол салынат. Бул тууралуу Бишкек мэри Айбек Жунушалиев парламентте билдирди. Ал ошондой эле шаардагы автотыгын маселесин чечүү үчүн көп деңгээлдүү унаа токтотуучу жайлар куруларын айтты. "Бул жайларды кура турган ишкерлерге аукциону жок эле түз келишим менен жерлерди бергенге даярбыз. Өкмөттөн 40 жер бергиле деген тапшырма түшкөн, азыр 6 жерибиз бар, башкасын дагы караштырып жатабыз", — деди калаа башчысы. Ал, мындан тышкары, көп кабаттуу үйлөрдүн дүкөнгө айланып кеткен унаа токтотуучу жайлары кайтарыларын кошумчалады.
Кыргызстандыктар май майрамдарында катары менен беш күн эс алат, тагыраагы, 1-5-май күндөрү иштебейт. Бул боюнча токтом долбоорун Эмгек, социалдык камсыздоо жана миграция министрлиги даярдап, өкмөткө сунуштаган. Беш күн катары менен эс алуу күндөрдү жылдыруудан улам топтолгон. 2-майда эс алганын кыргызстандыктар 1-сентябрда иштеп толтурат. 31-август — Эгемендүүлүк майрамы жекшембиге туш келгендиктен 1-сентябрь эс алуу күнү деп эсептелмек, бирок майдагы каникулдан улам жогорудагыдай чечим кабыл алынган. Эмгек, социалдык камсыздоо жана миграция министрлиги Эмгек кодексиндеги дем алышка туш келген майрам күндөрдү башка учурга жылдырган өкмөттүн кошумча чечимин алып салуу боюнча мыйзам долбоору бар экенин эске салат. Эгерде ал кабыл алынып кетсе, бул токтом күчүн жоготушу мүмкүн, тагыраагы, май майрамдары боюнча катар келген эс алуу күндөрүнүн ырааты өзгөрөт.
Нарын – Орук – Там унаа жолу 2025-жылдын 15-апрелине чейин убактылуу жабылды. Бул тууралуу "Кыргызавтожолу" мамлекеттик ишканасынан билдиришти. Маалыматка ылайык, мындай чечим Нарын райондук мамлекеттик администрациясынын башчы буйругунун негизинде кабыл алынды. Ошентип, Нарын – Орук – Там унаа жолунун Эки-Нарын айылынын 50-чакырым аралыгынан Капчыгай бөлүгүнүн 75-чакырымына чейинки унаа жолунун кыш мезгилинде аба-ырайынын жана жол шартынын татаалдыгынан тейлөөгө мүмкүн болбогонуна, кар көчкү түшүү коркунучу жаралгандыктан жарандардын коопсуздугун камсыз кылуу жана ири материалдык чыгымдардын болушуна жол бербөө максатында 2024-жылдын 14-ноябрынан тарта, 2025-жылдын 15-апрелине чейин убактылуу жабылды.