БИШКЕК, 13-ноя. — Sputnik. Украинада шайлоо 2025-жылдын 25-майында болушу мүмкүн, Киев мындай кадамга өлкө элинин ындыны өчүп калганынан улам барууда. Бул тууралуу британиялык Economist журналы жазганын РИА Новости билдирди.
"Элдин маанайынан улам жетекчиликтин алмашуусу тууралуу кептер жүрүүдө. Учурда киевдик саясатчылар эки датаны айтып жатат: аскердик абал жоюлушу мүмкүн болгон 2025-жылдын 20-январы (Трамптын инаугурациясы — ред.) жана катуу талкууланып жаткан 25-май", — деп айтылат макалада.
Басылма Зеленскийдин кеңсеси шайлоо тууралуу маалыматтарды четке какканы менен алгачкы даярдыктар башталганын божомолдогон. Журналдын айтымында, аймактык шайлоо штабдары мобилизацияланып, талапкерлердин тизмеси боюнча жумуштар башталууда. Зеленскийдин болушу мүмкүн делген атаандашынын өкүлдөрү шайлоонун зарылдыгы тууралуу билдиргени менен азыркы жетекчиликтин кескин реакциясынан чочулап, кеңири чөйрөдө айткандан кооптонуп турушат.
Басылма Зеленский менен мурда иштеп кеткен адамга таянып, Киев режиминин азыркы жетекчиси бир гана мөөнөт иштейм деген убадасына туруп отставкага кетип чоң пайда келтирерин жазган.
"Зеленскийдин бир эле жолу бар... Бул — шайлоо", — деген ал.
Октябрдын соңунда Зеленскийдин кеңсесинин башчысы Андрей Ермак Украинада шайлоо куралдуу жаңжал соңуна чыккандан кийин дароо өтөрүн, азыркы тапта Киевдин ресурсунун баары ошол жакка кетип жатканын айткан эле.
Владимир Зеленскийдин мөөнөтү 20-майда аяктаган. 2024-жылы өтө турган президенттик шайлоо аскердик абал жана жалпы мобилизациядан улам жылдырылган. Зеленский "азыр шайлоо өткөрчү маал эмес" экенин айткан болчу.
Россия президенти Владимир Путин алдын ала берилген баа боюнча Украинада ушу тапта жападан жалгыз мыйзамдуу бийлик парламент жана Жогорку Рада эсептелерин билдирген. Анын айтымында, эгер Украина президентин мыйзамдуу шайлоону кааласа аскердик абалды жокко чыгарышы керек болчу.