БИШКЕК, 13-ноя. — Sputnik. Миллиардер Илон Маск менен бизнесмен Вивек Рамасвами мамлекеттик кызматты майнаптуу кылуу боюнча жаңы депарматентти жетектейт. Бул туурасында жакында өткөн президенттик шайлоодо жеңген Дональд Трамп билдиргенин РИА Новости жазды.
"Улуу Маск америкалык мекенчил Вивек Рамасвами менен биргеликте иштеп, мамлекеттик кызматты майнаптуу кыла турган жаңы депарматентти жетектейт", — деген ал.
Трамптын айтымына караганда, "бул эки мыкты америкалык" "өкмөттүк бюрократияны бузуу", "ашыкча эрежелерди", "ысырапкорчулукту" кыскартуу жаатында иштешет. Андан сырткары, федералдык агенттиктерди реструктуризациялоо боюнча иш алып барышат.
Dogecoin (DOGE) аталышындагы жаңы департамент Маск жактырып колдоп келген криптовалютага байланыштуу.
Трамп, мындан сырткары, Пентагонду башкара турган талапкерди да атап жатат. Ал Гарвард жана Принстон университеттерин бүткөн майор чининдеги Пит Хегсет.
"Кабинетимде Пит Хегсетти коргоо министри кызматына көрсөттүм. Бул — мен үчүн сыймык", — деген Трамп.
Талапкер Миннесотанын Улуттук гвардиясынын курамында америкалык армияда, анын ичинде Кубадагы Гуантанамо базасында, андан сырткары, Ирак менен Афганстанда кызмат кылган. Кийинчерээк республикачыл Fox News телеканалында алып баруучу болуп иштеген.
Хегсет өзүнүн кээ бир билдирүүлөрү менен айырмаланып келет. Мисалы, Fox News эфиринде көзгө көрүнбөгөндөн кийин микробдордун болоруна ишенбей турганын жана колун 10 жыл жуубагандыгын айткан учуру бар.
Трамп буга чейин ЦРУнун башчылыгына Жон Рэтклиффти, улуттук коопсуздук боюнча кеңешчи кызматына конгрессчи Майк Уолцту сунуштаган. Конгрессчи Украинадагы чатакты дипломатия менен жөнгө салууну айтып келет.
Эскерте кетсек, АКШда президенттик шайлоо 5-ноябрда өткөн. Натыйжада Дональд Трамп XIX кылымдан бери Ак үйгө кайтып келген биринчи саясатчы болуп калды.