БИШКЕК, 11-ноя. — Sputnik. Улуттук онкология борборунун башкы дарыгери Бактыгүл Султангазиева кызматынан бошотулганын саламаттык сактоо министри Алымкадыр Бейшеналиев Жогорку Кеңештин социалдык саясат боюнча комитетинин жыйынында билдирди.
Ал Султангазиева ээлеген кызматынан кайсы берене боюнча бошотулганын тактаган жок.
"Мен башкы дарыгерликке үч талапкерди сунуштадым. Өкмөт кимисин тандаса ошол Улуттук борборду жетектейт. Бул адамдардын бардыгы медицина илимдеринин докторлору. Буга чейин президент Садыр Жапаров мени чакырганын, жолугушууга Камчыбек Ташиев, Акылбек Жапаров да катышканын айткам. Мамлекет башчынын тапшырмасы менен аталган борбордо текшерүү жүргүзүлүп, натыйжада мыйзам бузуу аныкталган", — деди Бейшеналиев.
