Мас абалында рулга отургандарды эки жылга айдоочулук укуктан ажыратуу сунушталууда. Тиешелүү мыйзам долбоору коомдук талкууга чыгарылды. ЖКККББ тарабынан даярдалган документте жорук кайталанса төрт жылга күбөлүктөн ажыратуу жана автоунаасын убактылуу алып коюу каралган. Ошондой эле айдоого укугу жок туруп, мас болуп унаа башкаргандар 10 күнгө камалат. Ушул эле жорук үчүн жашы 60тан ашкан эркектер, 55тен ашкан аялдар, I, II топтогу майыптар жана боюнда бар аялдар камакка алынбайт, бирок 20 миң сом айыпка жыгылат. Учурда мас абалында рулга отургандар бир жылга айдоочулук күбөлүгүнөн ажыратылат. Бирок буга чейин азыркы жаза натыйжа бербей жатканы белгиленип, 100 миң сом айып салуу сунушталган.
Эмгек, социалдык камсыздоо жана миграция министрлигинин диаспоралар жана мекендештер менен иштөө бөлүмүнүн башчысы Эркин Каримов эмгек мигранттарынын 70 пайызы Москвага барарын айтты. Ош шаарында Москванын "Көп функционалдуу миграциялык борборунун" филиалы ачылат.Анын айтымында, учурда мэрия сунуштаган имараттын техникалык мүнөздөмөлөрү каралууда.Ал ошондой эле мындай борборлор Өзбекстан менен Тажикстанда да ачылып, иш алып барып жатканын кошумчалады.
Кыргызстандык жана россиялык тарыхчылар көрүнүктүү кол башчы Михаил Фрунзенин өмүрүнө арналган сайт түзүштү. Бул тууралуу Алтай мамлекеттик университетинин сайтында кабарланган. Ал Алтай мамлекеттик университети (АлтМУ) жана Жусуп Баласагын атындагы Кыргыз улуттук университети (КУУ) тарабынан Фрунзенин туулганынын 140 жылдыгы жана көзү өткөнүнүн 100 жылдыгына карата даярдалды. Дата 2025-жылы белгиленет. Михаил Фрунзенин элесин түбөлүккө сактоо жана анын тарыхын бурмалоону алдын алуу Россиянын тарых коомунун приоритеттүү темаларынын катарында экени айтылды. "Жалпы тарыхый мурасыбызды эстен чыгарбашыбыз керек. Убакыттын өтүшү менен башкача баа берилиши ыктымал, бирок толугу менен жокко чыгарууга болбойт. Элдин тарыхый аң-сезимин өзгөртүүгө багытталган саясатка каршы туруу максатында ушул онлайн-агартуучу долбоор пайда болду. Бул ресурста биографиялык, документалдык, фото материалдар, китептер жана тасмалар сыяктуу маалымат булактарына таянуу менен чогултулду. Бир нерсени ойлоп табуунун зарылдыгы жок — булактардын өзү эле чындыкты айтып турат", — деди Алтай мамлекеттик университетинин Эл аралык мамилелер тарыхы институтунун директору Иван Назаров.Михаил Фрунзе 1885-жылы 2-февралда Пишпек шаарында төрөлгөн. Кыргызстандын борбору 65 жыл бою Фрунзенин атын алып жүргөн.
АКШдагы президенттик шайлоодо жеңген Дональд Трамп үгүт учурунда мигранттарды массалык депортациялоого берген убадасын аткарарын билдирди. Бул тууралуу РИА Новости жазды.Ал массалык депортациялоо планынын куну тууралуу суроого бул чечимди ишке ашыруудан башка арга жок экенин айткан. Жаңы шайланган Трамп үчүн миграциялык саясатты катаалдаштыруу шайлоо өнөктүгүнүн негизги пунктуларынын бири болду. Ал Жо Байдендин администрациясынын "өтө жумшак" саясаты Кошмо Штаттарды артта калган өлкөлөрдүн катарына түшүргөнүн бир нече жолу айткан. Буга чейин Трамп шайланса миллиондогон мыйзамсыз мигранттарды депортациялоону каалап жатканы айтылган. New York Times гезитинин жазганына караганда, алар атайы уюштурулган лагерлерде болуп өлкөдөн чыгарылышын күтүшөт.