БИШКЕК, 8-ноя. — Sputnik. Россиянын Кытай менен мамилеси үчүнчү өлкөлөргө, анын ичинде АКШга каршы түзүлгөн эмес. Бул тууралуу Владимир Путин "Валдай" форумунда айтты.
Ага "эгер президент Трамп телефон чалып, Кытайды жеңүү үчүн күчтөрдү бириктирели десе эмне деп жооп берет элеңиз" деген суроо узатылган.
"Биздин Кытай менен кызматташтыгыбыз бирөөгө каршы эмес. Биз алаканы бирөөгө, анын ичинде АКШга каршы түзгөн эмеспиз. Биз эки өлкөнү өнүктүрүү, элдердин коопсуздугун камсыздоо үчүн керектүү шарттарды түзүү үчүн достошуудабыз", — деп билдирген Путин.
Ал ушундай эле принцип Россиянын АКШ менен мамилесине да тиешелүү экенин белгиледи.
"Россия бирөө менен үчүнчү өлкөлөргө каршы бирикпейт. Президент мырзанын (Трамп — ред.) мындай суроосун элестете албайм. Ал мындай суроо биз жашап жаткан реалдуулуктан алыс экенин түшүнөт болсо керек. Өзгөчө Кытай менен ишенимдин, кызматташтыктын жана достуктун болуп көрбөгөндөй жогорку деңгээлине жетишкен учурда мындайды элестетүү дагы мүмкүн эместей сезилет", — деп толуктаган ал сөзүн.
"Валдай" эл аралык дискуссиялык форуму – Россия жана башка өлкөлөрдүн саясат таануу, экономика, тарых жана эл аралык мамилелер жаатындагы алдыңкы эксперттеринин биримдиги.