Түрк мамлекеттер уюмунун күчү — мүчө мамлекеттердин сырткы саясатта бирдиктүү көз карашты карманып келе жатканында. Мындай пикирин Токон Мамытов Sputnik Кыргызстан радиосуна маек куруп жатып билдирди.
Анын айтымында, аталган уюм 22 жылдан берүү стабилдүүлүктү кармап келе жатат.
"Советтер Союзунун урашы дүйнөлүк геосаясатта чоң окуя болгон. Кыргызстан эгемендүүлүгүн жаңы алган кезде 1992-жылы ошол кездеги Түркиянын президенти түрк тилдүү мамлекеттердин лидерлерин өз өлкөсүнө чакырып, мындан аркы алакалар жөнүндө пикир алышышкан. Түрк мамлекеттеринин уюму мына ошондо түптөлгөн. Ошондон бери стабилдүүлүгүн жоготпой, сырткы саясий иштерде бир көз карашты карманып келе жатат. Аталган уюмдун эки канаты бар. Бири Кыргызстан, Казакстан, Өзбекстан болсо, экинчиси Азербайжан менен Түркия. Тең салмактуулугу ушунда. Түркия менен Азербайжан илгертен коммуникациянын ордосу болуп келген, ал эми Орто Азия аймагы ресурстуу жер. Дүйнөнүн башка мамлекеттери да кызыгып, соңку жылдары бул аймакты тиркей кеткен түрдүү уюмдарды ачып жаткандары да ошондон. Айтор, Түрк мамлекеттер уюмуна мүчө өлкөлөр бир-бирден турса анча билинбегени менен, бириксе дүйнө геосаясатында олуттуу орду бар", — деди Мамытов.
Ал байкоочулук макамындагы мамлекеттердин көбөйүп жатканын уюмга дүйнө мамлекеттеринин кызыкчылыгы артып жатканы деп түшүндүрдү.