БИШКЕК, 7-ноя. — Sputnik. Батыштын Россия жана башка бир катар өлкөлөрдүн көз карандысыз саясатына жасаган агрессиясынан улам дүйнөлүк процесстер регионалдашты, бул оң маанайдагы көрүнүш. Мындай пикири менен РФ ТИМинин жетекчиси Сергей Лавров Сочидеги "Валдай" эл аралык талкуу клубунун 21-жыйынында сүйлөп жатып айтканын РИА Новости жазды.
"Дал ушул Батыш Россия баштаган бир катар мамлекеттердин көз карандысыз саясатына каршы мыйзамсыз экономикалык санкциялар камтылган реакциясы менен глобалдашуунун дүйнөлүк процесстердин регионалдашуусун шарттай турчу системасын түздү", — деди Лавров журналисттердин суроолоруна жооп берип жатып.
Министр бул оң таасир бере турган жагдай экенин, Россия, Кытай жана БРИКС мамлекеттери айтып-деп жаткан көп полюстуулукту камсыздай турчу көрүнүш экенин белгиледи.
"Бир мамлекеттин үстөмдүгү жоюлганда өнүгүүнүн бир нече очогу пайда болот, алар бири-бири менен алака түзүү аркылуу алдыга жылат", — деди Лавров.
Муну менен бирге дипломат Эл аралык валюта фонду, Дүйнөлүк банк, Дүйнөлүк соода уюму сыяктуу институттардын иши улана берерин белгиледи.
"Ал жакта бир топ адилетсиз процесстер жүрүп жаткнадыктан дүйнөлүк көпчүлүк алардын тең укуктуу болушун каалоодо. Батыш буга каршы", — деди министр.
Лавров анткен менен Глобалдуу Түштүк менен Чыгыштын регионалдык уюмдары сырткы кийлигишүүдөн мыктап корголгон альтернативаны каалап жатканына да токтолгон. Мында төлөм платформалары, логистикалык маршруттар, транспорттук макулдашуулар камтылган.
"Валдай" клубунун "XXI кылымда өнүгүү үчүн жалпы коопсуздук жана тең мүмкүнчүлүктөр" деп аталган быйылкы жыйыны 4-ноябрда башталган, бүгүн соңуна чыгат. Жыйынтыктоочу бөлүгүндө РФ президенти Владимир Путиндин кайрылуусу күтүлүүдө.