БИШКЕК, 6-ноя. — Sputnik. Билим берүү жана илим министри Догдуркүл Кендирбаева Бишкектин №57 мектебинде окуучунун энеси менен мугалимдин ортосундагы чатак боюнча үн катты.
Эскерте кетсек, мектепте окуучунун энеси чатак чыгарып, мугалимди келекелеген видео тараган. Анда окуучулардын бирөөсүнүн энеси окуучулардын көзүнчө мугалимди басмырлаганын угууга болот.
"Менин балам менен үнүңдү көтөрүп сүйлөгүдөй кимсиң? Бул сенин менчик мектебиң эмес. Сен директор эмессиң, жөн гана мугалимсиң! Мээмди чакпа, сендейдин далайын көргөм. Сени менен министрликтен дагы сүйлөшөбүз", — деген ал ыйлап жаткан мугалимге.
Буга мугалим окуучуну зекип койгону себеп болгону айтылууда. Ошондой эле окуядан кийин мугалим иштен өз каалоосу менен арыз жазып кетип калганы белгилүү болду.
Бул боюнча билим берүү жана илим министри Догдуркүл Кендирбаева социалдык тармактагы баракчасына кайрылуу жазды.
"Мугалим жалдап алган кул же малай эмес! Эч кимдин эч качан сабак өтүп жатканда класска киргенге акысы жок! Өзгөчө окуучулардын жана ата-энелердин алдында басмырлоого жол берилбейт! Укук коргоо органдары баа берет деп ойлойм, окуяны жеке көзөмөлгө алдым", — деген министр.
Ошондой эле министр учурда мугалим балдарга ата-энеден кем калбай тарбия, билим берип жатканын кошумчалаган.
Бул мугалимдерди басмырлап, келекелеп, кордогон биринчи учур эмес. Өлкөдө мындай учурлар көбөйүп кеткендиктен эки жыл мурда мугалимдерди мазактап-шылдыңдаган жарандарга чара көрүү демилгеленген. Бирок депутаттар буга каршы чыгып, кийин мыйзам өзгөртүлүп, педагогду шылдыңдаган окуучунун ата-энесине эскертүү, ал эми мугалимге адепсиз сөздөрдү айткан чоң кишилерге (ата-энелерге) 1000 сом айып салууга чейин жумшартылган.