БИШКЕК, 2-ноя. — Sputnik. Ааламга өзөктүк апааттан сактаган келишим керек, ири державалар дүйнө үчүн жоопкерчиликти алышы зарыл. Бул тууралуу Сербиянын вице-премьер-министри Александр Вулин билдиргенин РИА Новости жазды.
Буга чейин Беларусь президенти Александр Лукашенко Евразия коопсуздугу боюнча экинчи Минск эл аралык конференциясында дүйнөдө эл аралык коопсуздукту кепилдөөчү укуктук документтер дээрлик калбаганын, бул жаатта жаңы келишимдерди түзүү боюнча иштер жүргүзүлбөй жатканын билдирген.
"Азыр Европада эң баалуу нерсе — тынчтык жана бейпилдик. Европадагы бир топ саясатчылар тынчтыкка эмес, Россияны аскердик жактан жеңүүгө умтулушууда. Азыркы тапта өзөктүк апааттан сактап кала турган жаңы келишим керек болуп турат. Ири державалар дүйнөнүн тагдыры үчүн жоопкерчиликти алышы керек", — деди Вулин Минскидеги Евразиялык коопсуздук боюнча экинчи эл аралык конференцияда.
Анын айтымында, аталган келишимден улам жаңы уюм пайда болушу ыктымал.
"Биз муну жаңы Ялта конференциясы деп коёбузбу, башкысы, келишим түзүлүшү керек", — деди вице-премьер.
Вулин Батыш бир уюлдуу дүйнөнүн доору бүткөнүн аңдабай дагы деле үстөмдүк кылууга далалат кылып жатканын белгиледи. Ошол эле учурда ал "жамааттык Батыш" жана "жамааттык Чыгыш" деп бөлүүгө каршы экенин, анткени баалуулуктар топтому ар башка экенин айткан.
"Ошондуктан евразиялык блок жөнүндө сөз болгондо башка континенттеги окшош баалуулуктарды карманган өлкөлөрдү да эске алуу керек. Маселен, биз (сербдер. – ред.) кудайга ишенип, улуттун суверендүүлүгүн, салттуу үй-бүлө баалуулуктарын тутунабыз. Батыштагылар бул нерселерди өзүнүн баалуулугу катары эсептебейт", — деп сөзүн жыйынтыктады Вулин.