БИШКЕК, 2-ноя. — Sputnik. Президент Садыр Жапаров маданият жана искусство ишмерлерин кесиптик майрамы менен куттуктады.
Жапаров кыргызды эл катары сактап да, даңктап да келе жаткан бул эне тили менен маданияты экенин белгилеген.
"Он сегиз миң аалам жаралгандан берки карт тарыхыбыз, даңазалуу ата-бабаларыбыз тууралуу таш бетине чегилген кыргыз жазуулары ошол убакта эле кеменгер элибиздин жазуу-сызуудан, маданияттан кабардар болгондугун тастыктап турат", – деген президент маданият жаатын колдоо үчүн жасалып жаткан аракеттерди да тизмектеген.
Айтымында, райондук маданият үйлөрүндөгү техникалык каражаттар жаңыртылган. Ошондой эле көп жылдардан бери бир да жолу оңдоп-түзөөдөн өтпөгөн мамлекеттик цирк толук жаңыланып, кайрадан ишке киргенин кошумчалады.
"Театр, оюн-зоок мекемелерин жаңы репертуарлар менен толуктоого жана сахна костюмдарын тиктирүүгө, гастролдорду уюштурууга шарттарды түзүп берип жатабыз. Максатыбыз – кыргыз маданиятынын алтын доорун кайра бир кайталап, "кыргыз кереметин" даңазалоо. Маданиятыбыздын бардык тармагынан жаңы ысымдар, жаңы жүздөр чыкса дейбиз. Мамлекет жаш таланттарды окутуу, тарбиялоо, улуттук маданиятыбызда секирик жасоонун кандай ыкмасы болбосун колдоп берүүгө даяр. Кыска аралыкта экономикалык чоң секирик жасаган эгемен Кыргызстан маданият жаатында жаңы бийиктиктерди багындырышы керек", – деди Жапаров.
Ал сөзүнүн соңунда маданият кызматкерлерине чыгармачыл эргүү каалап, улуу өнөрдү алып жүрүүчү жаратмандардын катары калыңдай берсин деген тилегин билдирген.