Садыр Жапаров Кыргызстанда катталып, бирок чет өлкөлөрдө гана анын ичинде кооптуу аймактарга учкан авиакомпанияларды текшерүүнү тапшырганын социалдык тармактардагы баракчасына жазды. Өлкө башчы Кыргызстандын каттоосунан чыгарылган Ил-76 учагы менен Суданда болгон окуя көзөмөл жүргүзүүнүн зарылдыгын курчутканын белгиледи. "Жарандык авиация агенттигинин маалыматына караганда, Кыргызстанда катталган айрым авиакомпаниялар чет өлкөдө гана рейстерди аткарып, кээде кооптуу аймактарда учаары аныкталды. Мындай иш-аракеттер бул авиакомпаниялар эмне ташып жаткандыгы жана алардын максаттары тууралуу олуттуу жана негиздүү суроолорду жаратат. Биздин максат – Кыргызстандын туусу алдында иш жүргүзгөн ар бир авиакомпаниянын өз ишмердүүлүгүн ачык жана эл аралык коопсуздук стандарттарына ылайык жүргүзүүсүн камсыздоо", — деди мамлекет башчы. Президент мындай жагдайлар өлкөнүн Европа Биримдигинин кара тизмесинен чыгуу аракетине коркунуч жаратарын айтып, тиешелүү органдарга чет өлкөдө гана иш жүргүзгөн авиакомпанияларды текшерип, талапка жооп бербегендерге чара көрүүнү тапшырганын белгиледи.
Тышкы иштер министри Жээнбек Кулубаев Түрк мамлекеттер уюмунун башкы катчысы Кубанычбек Өмүралиев менен жолукту. Бул тууралуу министрликтин басма сөз кызматы кабарлады. Маалыматка ылайык, жолугушуунун жүрүшүндө башкы катчы үстүбүздөгү жылдын 6-ноябрында Бишкек шаарында өтө турган Мамлекет башчыларынын кеңешинин жана Тышкы иштер министрлер кеңешинин кезектеги жыйындарына көрүлүп жаткан даярдыктын жүрүшү тууралуу министрге маалымат берди. Мындан тышкары, тараптар алдыдагы мезгилге Түрк мамлекеттер уюмундагы Кыргызстандын төрагалыгы боюнча пикир алмашып, төрагалыктын алкагындагы иш-чаралардын планын талкуулашты.
Бишкекте эки унаа кагышып, аллеяда бараткандар кошо жабыркады Кайгуул милициясы кабарлагандай, окуя Профсоюз менен Месарош көчөлөрүнүн кесилишинде болгон. Анда Nissan March жана BMW унаасы кагышып, экөө аллеяга сүрүлүп барып адамдарды сүзгөн. Кырсыктан беш адам жаракат алып ооруканага жеткирилди. Ал эми унаалар айып короого токтотулуп, териштирүү иштери жүрүүдө.
Ааламга өзөктүк апааттан сактаган келишим керек, ири державалар дүйнө үчүн жоопкерчиликти алышы зарыл. Бул тууралуу Сербиянын вице-премьер-министри Александр Вулин билдиргенин РИА Новости жазды. Буга чейин Беларусь президенти Александр Лукашенко Евразия коопсуздугу боюнча экинчи Минск эл аралык конференциясында дүйнөдө эл аралык коопсуздукту кепилдөөчү укуктук документтер дээрлик калбаганын, бул жаатта жаңы келишимдерди түзүү боюнча иштер жүргүзүлбөй жатканын билдирген. Вулин Батыш бир уюлдуу дүйнөнүн доору бүткөнүн аңдабай дагы деле үстөмдүк кылууга далалат кылып жатканын белгиледи. Ошол эле учурда ал "жамааттык Батыш" жана "жамааттык Чыгыш" деп бөлүүгө каршы экенин, анткени баалуулуктар топтому ар башка экенин айткан. ///ЭМИ ВАЛЮТА КУРСУ МЕНЕН ТААНЫШЫП АЛЫНЫЗДАР: Улуттук банктын билдирүүсү боюнча ушул тапта: 1 АКШ доллары 85 сом 80 тыйынга евро 93 сом 20 тыйынга рубль 88 тыйынга Казак тенгеси 18 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 66 сом 90 тыйындан баштап, 67 сом 40 тыйынга чейин, Аи 95 үлгүсүндөгү күйүүчү май 74 сом 40 тыйындан 75 сом 40 тыйынга чейин, дизель майы 74 сом 80 тыйындан, 75 сом 30 тыйынга дейре, ал эми унаа газынын литри 37 сомдон сатылууда. АБА ЫРАЙЫ 3-ноябрга караган түнү жаан-чачын күтүлбөйт. Батыштан соккон шамалдын ылдамдыгы секундасына 3-8 метрге жетет. Жекшембиде күн ачык болот. Мындай маалыматты Кыргызгидромет таратты. Абанын температурасы Чүйдө +15...+20, Талас аймагында +14...+19, Ош, Жалал-Абад жана Баткен облустарында +15...+20, Ысык-Көл жана Нарын дубандарында +11...+16 градус жылуу болот. Ал эми Бишкек жана Ош шаарында күндүн табы +18...+20 градуска көтөрүлөт.