Президент Садыр Жапаров маданият жана искусство ишмерлерин кесиптик майрамы менен куттуктады. Жапаров кыргызды эл катары сактап да, даңктап да келе жаткан бул эне тили менен маданияты экенин белгилеген. "Он сегиз миң аалам" жаралгандан берки карт тарыхыбыз, даңазалуу ата-бабаларыбыз тууралуу таш бетине чегилген кыргыз жазуулары ошол убакта эле кеменгер элибиздин жазуу-сызуудан, маданияттан кабардар болгондугун тастыктап турат", – деген президент маданият жаатын колдоо үчүн жасалып жаткан аракеттерди да тизмектеген. Айтымында, райондук маданият үйлөрүндөгү техникалык каражаттар жаңыртылган. Ошондой эле көп жылдардан бери бир да жолу оңдоп-түзөөдөн өтпөгөн мамлекеттик цирк толук жаңыланып, кайрадан ишке киргенин кошумчалады. Ал сөзүнүн соңунда маданият кызматкерлерине чыгармачыл эргүү каалап, улуу өнөрдү алып жүрүүчү жаратмандардын катары калыңдай берсин деген тилегин билдирген.
Бүгүн ишемби жана жекшембиде 7 шаардагы калкты тейлөө борборлорунда аралыктан добуш берүүгө арыздар кабыл алынат. Бул тууралуу Борбордук шайлоо комиссиясынан кабарлашты. Маалыматка ылайык, аталган борборлор эртең мененки 9:00дөн кечки 18:00гө чейин иштешет. Калкты тейлөө борборлорунун даректери: Бишкек шаары, Ч.Валиханов көчөсү, 2; Ош шаары, Т.Касымбеков көчөсү, 8г/1; Нарын шаары, В.Ленин көчөсү, 39 Жалал-Абад шаары, Б.Алыкулов көчөсү, 1; Каракол шаары, Гебзе көчөсү, 124; Баткен шаары, Мурат Салихов көчөсү, 33/1; Талас шаары, Дзержинский көчөсү, 28. Аралыктан добуш берүүгө байланыштуу бардык суроолорго 1255 ишеним телефону аркылуу жооп алууга болот.
Бүгүн 2-ноябрда Бишкектин борбордук аянтында маданият кызматкерлеринин күнүнө карата майрамдык иш-чара өтөт. Маданият, маалымат, спорт жана жаштар саясаты министрлигинин басма сөз кызматы билдиргендей, концерт кечки саат 18:00дө башталат. Анда кыргыз эстрадасынын белгилүү жылдыздары ырдашат. Буга байланыштуу Бишкек шаардык милиция кызматынын басма сөз кызматы Чүй проспектисинин Эркиндик бульварынан Панфилов көчөсүнө чейинки бөлүгү саат 17:00дөн баштап жабыларын эскертти.
АКШнын президенттигине талапкер Дональд Трамптын Россия менен Кытайдын ортосунда ажырым жаратуу убадасы ишке ашпасын "Валдай" клубунун программалык директору Иван Тимофеев билдиргенин РИА Новости жазды. Анын айтымында, Москва менен Пекиндин ортосундагы кызматташтыктын деңгээли болуп көрбөгөндөй деңгээлге чыккандыктан эки мамлекетти бири-биринен алыстатуу мүмкүн эмес. Трамп буга чейин президенттик шайлоодо жеңсе Россия менен Кытайдын ортосунда ажырым жаратууну убадалаган. "Муну риторика катары караса болот, бирок кандайдыр бир деңгээлде чындыкка жакын. Анткени АКШнын Украинадагы жана Европадагы саясаты Россия менен Кытайды жакындаткан. Эки өлкө азырынча аскерий союздаш эмес, бирок алардын өнөктөштүгүнүн деңгээли болуп көрбөгөндөй деңгээлге жетти. Эми АКШ Кытайды да, Россияны ооздуктаганга эки эсе аракет кылышы керек", — деген эксперт. Тимофеев белгилегендей, мурда АКШ Россияны ооздуктоого аз каражат коротсо, азыр анын көлөмү кыйла көбөйгөн. Ал эми Кытайдын өнүгүүсү уланууда. Москва болсо Түндүк Корея менен дагы жакындашканын белгиледи эксперт.