Садыр Жапаров кечээ Казакстан Мажилисинин төрагасы Ерлан Кошановду кабыл алды. Бул тууралуу президенттин маалымат кызматынан кабарлашты. Жолугушуда өлкө башчы өз ара сооданын ырааттуу өсүшүн жана соода-экономикалык байланыштардын кеңейишин белгиледи. Ал ошондой эле Казакстандын президенти Касым-Жомарт Токаевге салам жолдоп, Кыргызстан мындан ары да достук, бир туугандык, союздаштык жана өз ара сый-урматтын негизинде кыргыз-казак мамилесин өнүктүрүүгө даяр экендигин айтты.Ал эми Ерлан Кошанов Кыргызстандын жарандарынын байгерчилигин жогорулатууга багытталган президент Садыр Жапаровдун реформаларын Казакстан толугу менен колдой турганын айтты. Ерлан Кошанов расмий сапар менен Кыргызстанга 31-октябрда келген. Анын алкагында ал парламенттер аралык кызматташтык боюнча кеңештин отурумуна катышты.
Кыргызстанда 12 жылдык окууга өтүү концепциясына кол коюлду. Бул тууралуу Билим берүү министрлигинен билдиришти.Документтеги урунттуу учурлар: балдар 6 жаштан баштап мектепке кабыл алынып, нөлүнчүлөр биринчи класс катары эсептелет. Бул өзгөрүү менен мектепти бүткөндөрдүн жаш курагы азыркыдай эле калат; 12 жылдык билим берүү бир нече жыл ичинде этап-этабы менен киргизилет; бир окуучу — бир секирик. Бардык окуучу бир эле жолу секирик жасайт. Кыргызстан 11 жылдык окутууга өткөндө дал ушундай кылган. Эми 12 жылдык билим берүүдө дагы ошол ыкма колдонулат; 12 жылдык билим берүү жөнүндө аттестат 2027-2028-окуу жылынан тарта бериле баштайт; 2019-жылкы балдар 12 жылдык окууну секирик жасабастан 2036-2037-окуу жылында бүтөт.
Кыргызстандарттын сертификаттары ЕАЭБдин бардык өлкөлөрүндө таанылган. Бул тууралуу Экономика жана коммерция министрлигинин алдындагы Стандартташтыруу жана метрология борборунун директору Болотбек Нурматов билдирди. Ал Sputnik Кыргызстан маалымат борборунда өткөн "Кыргызстан ЕАЭБ өлкөлөрү үчүн продукциянын сапатын кантип жакшыртат" аттуу брифингге катышты."Кыргызстандарт берген сертификаттар, Кыргызстандарт каттоого алган декларациялар же биз чыгарган протоколдор Бажы биримдигинин (азыркы ЕАЭБ) алкагында толугу менен таанылат. Бул Бажы биримдигинин талаптары толук аткарылды дегенди билдирет... Биз Кыргызстандарттын базасында берген сертификаттар да Бажы биримдигинин бардык өлкөлөрүндө таанылат", — деди Нурматов. Борбордун директору сапаттуу инфраструктура системасы ЕАЭБ талаптарына толук жооп берерин кошумчалады. Бул экономикага оң таасирин тийгизет. Адис продукциялар сертификация процедурасынан өткөндөн кийин эркин жүрө аларын кошумчалады.
Бүгүн кечинде "Ала-Тоо" аянты автоунаалар үчүн жабык болот. Бул тууралуу Патрулдук милициянын башкармалыгынан билдиришти. Маалыматка ылайык, 2-ноябрда маданият кызматкерлеринин кесиптик майрамына карата башкы аянтта концерт уюштурулат. Мындан улам саат 17:00дөн концерт бүткөнгө чейин Чүй проспектинин Эркиндик бульварынан Панфиловго чейинки бөлүгү автоунаалар үчүн жабык болот. Маданият министрлиги кесиптик мааракеге карата "Ала-Тоо" аянтында концерт боло