БИШКЕК, 1-ноя. — Sputnik. Евразиялык коопсуздук боюнча Минск эл аралык экинчи конференция — Казандагы БРИКС саммитинде башталган диалогдун уландысы. Бул тууралуу союздук өлкөнүн мамлекеттик катчысы Дмитрий Мезенцев билдиргенин РИА Новости жазды.
"Аталган конференция Россиянын президенти Владимир Путиндин төрагалыгы астында Казанда өткөн мазмундуу, масштабдуу диалогдун уландысы болду. БРИКС бири-биринин принциптерин жана кызыкчылыктарын урматтаган, ар биринин үнү угула турган, көптөгөн мамлекеттердин өкүлдөрүн бириктирген формат катары ондогон өлкөлөргө өзүнүн баалуулугун жана жагымдуулугун көрсөттү", — деди Мезенцев.
Ал иш-чара Россия менен Беларуска болуп көрбөгөндөй басым жасалып жаткан маалда өтүп жатканын айтып, ишеним, теңдик, өнөктөштүк жана эл аралык укукка негизделген көп полярдуу дүйнөнүн моделин коргоо катары сунушталып жаткан күн тартибине көңүл бурарын белгиледи.
Мамлекеттик катчы Батыш лидерлери Москва менен Минскинин позициясын уккусу келбей турганын айтып, муну саясий кереңдик катары сыпаттады.
Ал ошондой эле Минск конференциясынын алкагында ШКУнун баш катчысынын орун басары Нурлан Ермекбаев менен жолугуп, Беларусь менен Россиянын союздук мамлекеттин форматындагы алакалары, интеграциялык программаларды ишке ашыруу боюнча тараптардын аракети тууралуу маалымат бергенин билдирди. Мамлекеттик катчынын айтымында, бул ШКУга мүчө өлкөлөр үчүн жакшы тажрыйба болуп калышы мүмкүн.
Евразиялык коопсуздук боюнча II Минск эл аралык конференциясы 31-октябрдан 1-ноябрга чейин Беларустун борборунда өттү. Беларустун Тышкы иштер министрлиги конференциянын максаты — дүйнөдөгү негизги оюнчулардын ортосундагы аскердик жана саясий карама-каршылыктар шартында евразиялык коопсуздукту талкуулоо экенин белгиледи.
БРИКС — 2006-жылы түзүлгөн мамлекеттер аралык бирикме. Россия 2024-жылдын 1-январынан баштап БРИКСке төрагалыкты алган. Быйыл уюмга жаңы мүчөлөр кирди. Эми аталган уюмга Россия Федерациясы, Бразилия, Индия, Кытай жана Түштүк Африкадан тышкары Египет, Эфиопия, Иран, БАЭ жана Сауд Арабия кирет. Россиянын БРИКСке төрагалыгы адилеттүү глобалдык өнүгүү жана коопсуздук үчүн көп тараптуулукту бекемдөө урааны менен өтүүдө. Казанда БРИКСтин саммити 22-октябрдан 24-октябрга чейин созулду.