12 жылдык окуу концепциясы бекиди. Балдар бир жылга секиришет. Түркиянын президенти менен Венгриянын премьер-министри Кыргызстанга келетЧүй облусундагы Шамшы суусуна чакан ГЭС курулат. Алдыда кененирээкКыргызстанда 12 жылдык окууга өтүү концепциясына кол коюлду. Бул тууралуу Билим берүү министрлигинен билдиришти. Концепция билим берүү системасын жаңылоого жана заманбап талаптарга ылайыкташтырууга багытталган. Ага ылайык, балдар 6 жаштан баштап мектепке кабыл алынып, нөл класстагылар биринчи класс катары эсептелет. Бул өзгөрүү менен мектепти бүткөндөрдүн жаш курагы азыркыдай эле калат; 12 жылдык билим берүү бир нече жыл ичинде этап-этабы менен киргизилет; бир окуучу — бир секирик. Бардык окуучу бир эле жолу секирик жасайт. Кыргызстан 11 жылдык окутууга өткөндө дал ушундай кылган. Эми 12 жылдык билим берүүдө дагы ошол ыкма колдонулат; 12 жылдык билим берүү жөнүндө аттестат 2027-2028-окуу жылынан тарта бериле баштайт.
Россия-Кыргыз өнүктүрүү фондунун колдоосу менен Чүй облусундагы Шамшы суусуна чакан ГЭС курулат. Бул тууралуу аталган фонддон билдиришти. Маалыматка ылайык, долбоордун наркы 2 миллион доллар болсо, анын жарымын фонд бөлүп берет.Шамшы ГЭСи жылына 10 миллион киловатт-саат электр энергиясын өндүрүп, Чүй районунун 10 пайыз муктаждыгын жаба алат. Станцияны ишке берүү 2026-жылга пландалган. Россия-Кыргыз өнүктүрүү фондунун төрагасы Артем Новиков соңку 3,5 жылда фонд гидроэнергетика тармагындагы 16 долбоорду каржылаганын белгиледи. "Аталган ГЭСтин курулушу энергетика тармагын өнүктүрүүдөгү маанилүү кадам. Бул долбоор аймакка да, жалпы Кыргызстанга да пайдалуу болоруна ишенем", — деди Новиков.
Жер семирткичтерди чачуу, өсүмдүктөрдү зыянкечтерден дарылоо үчүн агродрондор, учуучу жеңил авиацияны колдонуу толук кандуу ишке аша баштады. Бул тууралуу Айыл чарба министрлигинен билдиришти. Маалыматка ылайык, авиация менен күнүнө 500 гектарга чейин иштөөгө мүмкүн болуп, баасы гектарына орточо 500 сомдон болот. Ысык-Ата районунда бүгүн жаңы МТСтин ачылышы болуп, заманбап жаңы техникалар көргөзмөгө чыгарылган."Жер иштетүү кызматтарын көрсөтө турган дрондор, учуучу жеңил авиация айыл чарбасын жаңы деңгээлге көтөрөт. Дрондорду, авиацияны айыл чарбада колдонуу дыйкандардын түйшүгүн жеңилдетип, чыгымын, убактысын үнөмдөйт. Бул жагдай дыйкандарга жер иштетүү процесстерин оптималдаштырууда жана түшүмдүүлүктү жогорулатууда эффективдүү натыйжа берет", — деди иш-чарада суу ресурстары, айыл чарба жана кайра ишитүү өнөр жайы министри Бакыт Төрөбаев.Ошондой эле министрлик айылдык товар өндүрүүчүлөр үчүн МТСтердин паркын толуктоо, жаңылоо жана заманбап айыл чарба техникалары менен камсыздоо боюнча бир катар иштерди жүргүзүп жатканы кошумчаланды.
Түркиянын президенти Режеп Тайип Эрдоган 5-ноябрда мамлекеттик сапар менен Кыргызстанга келет. Бул тууралуу президенттик администрациянын тышкы саясат бөлүмүнүн башчысы Муратбек Азымбакиев билдирди. Ал эми Венгриянын премьер-министри Виктор Орбан расмий сапар менен келери айтылды. Сапардын алкагында жогорку деңгээлдеги сүйлөшүүлөр пландалган. Ошондой эле алар 6-ноябрда Түрк мамлекеттер уюмунун мамлекет башчыларынын кеңешинин жыйынына катышат. Сапардын жыйынтыгы боюнча Кыргызстан менен Түркиянын жана Венгриянын стратегиялык кызматташтыгын кеңейтүүгө жана мамлекеттер аралык мамилелерин мындан ары чыңдоого багытталган бир катар эки тараптуу документтерге кол коюу пландаштырылууда.