Кыргыз Республикасынын баатыры Исхак Раззаков атындагы орден негиздөө сунушталды. Мындай демилгени депутат Миргүл Темирбаева Жогорку Кеңеште көтөрдү. Ал мамлекеттик жана саясий ишмердин эмгектерин тизмектеп, алар согуштан кийинки мезгилде өлкө өнүгүшүнө эбегейсиз салым кошконун белгиледи. Темирбаева бул орден мамлекетке ак ниет кызмат кылган мамлекеттик жана муниципалдык кызматкерлерге, өлкөнүн экономикасын өнүктүрүүгө салым кошкон ишкерлерге ыйгарыларын белгиледи. Исхак Раззаков — мамлекеттик жана саясий ишмер. Ал 1950-1961-жылдары Кыргызстан Компартиясынын борбордук комитетинин биринчи катчысы болгон.
Казакстан Мажилисинин төрагасы Ерлан Кошанов Кыргызстанга расмий сапар менен келди. Бул тууралуу парламенттин маалымат кызматынан билдиришти.Конокту "Манас" эл аралык аба майданынан Жогорку Кеңештин төрагасынын орун басары Нурбек Сыдыгалиев жана Казакстан менен кызматташтык боюнча депутаттык достук тобунун жетекчиси Кундузбек Сулайманов тосуп алды. Иш сапардын алкагында бир катар жолугушуулар өткөрүлүп, эки өлкөнүн парламент төрагалары тар жана кеңейтилген курамда сүйлөшүүлөрдү жүргүзөт. Мындан тышкары, тараптар парламенттер аралык кызматташтык боюнча кеңештин отурумуна катышат.
Министрлер кабинетинин төрагасы Акылбек Жапаров Бишкектин жанындагы Орок айылында бир катар объектилердин курулушун көрдү. Бул тууралуу өкмөттүн маалымат кызматынан кабарлашты. Маалыматка ылайык, аквапаркы бар оюн-зоок жайынын жалпы аянты 10 гектарды түзөт. Парктын жанында МИК тарабынан көп кабаттуу турак жай комплекси курулуп, жалпы билим берүү мекемеси менен бала бакчанын курулушу да пландалууда. Мындан тышкары, футболдук стадион курулуп жатат. "Заманбап стадион, жаңы кооз оюн-зоок паркы жана башка инфраструктура борборду кооздоп, шаардын жаңы имиджин түзөт", — деди Жапаров. Текшерүүнүн жыйынтыгы менен тиешелүүгени кошумчаланды.
Бишкекте 9-ноябрда мектеп менен демөөрчүлөрдү жолуктурган билим кеңеши өтөт. Бул тууралуу уюштуруучулар билдирди. Билим кеңешинин максаты — аймактардагы билим берүү тармагындагы көйгөйлөрдү талкуулап, чечим издөө. Анда аймактарга жеке менчик мектептерди салууга кызыктар ишкерлер, айылындагы мектебине салым кошууну каалаган жарандар, мектептерди башкаруучу адистер, билим берүү тармагындагы эксперттер катышат жана сөз сүйлөйт.
Батыштагылар Түштүк Корея жетекчилигин Киевге курал-жарак ташууга мажбурлап жатат, Россия Сеул мындай тузакка илинбейт деп ишенүүдө. Бул тууралуу Россиянын Бириккен улуттар уюмундагы туруктуу өкүлү Василий Небензя айтканын РИА Новости жазды. "Зеленскийдин режимин колдогондор эки жылдан бери Корея Республикасынын жетекчилигин Киев менен аскерий-техникалык багытта кызматташып, өтө керек болуп турган учуучу техникасын ташыттырууга аракет кылып келишет. Бул жерде Вашингтон, Лондон жана Брюсселдин Пхеньянга каршы ызы-чуусу зарыл болуп турат, анткени Киев режими алардагы запасты аягына чейин соруп бүткөн", — деген өкүл БУУнун Коопсуздук кеңешинин жыйынында.Дипломат ошондой эле Түштүк Кореядагы кесиптештери мындай кылтакка илинбегенге дарамети жетет деп ишенерин кошумчалаган.