Акын Туяк Эрназар уулунун ыр жыйнагын кыргыз эл акыны Эгемберди Эрматов изилдеп, китеп кылып чыгарып койгон. Жыйнактын ичинде бир ууч гана ырлары сакталып калган. Туяк Эрназар уулу олуя, заманачы акын болгон. «Акыр заман келгенде, уулуң кетер урумга, кызың кетер кырымга» деген саптары азыркы миграцияны сүрөттөп койгонун кыбырасы Асамидин Бүркүтов айтып берди.
Туяк Эрназар уулу болжол менен 1856-жылы жарык дүйнөгө келген. Атасы Эрназар Пум айылындагы Төөлөс уруусуна караштуу Карынчы уругунан чыккан кедей киши болгон экен. Бирок колунан көөрү төгүлгөн уста болуп, эл арасында кадыр-баркка конуптур. Туяк ата-энесинен эрте ажырап, агасы Эшназардын колунда чоңойгон. Ичкилик акындары комуз чертпей туруп эле ырды жамгырдай төгүп келишсе, Туяк ырчы алардан айырмаланып комузду так чертип, көптөгөн күүлөрдү аткара билген. Кыл кыякты да безеленте тартчу дешет. Ал тургай тоо булбулу Токтогул акын менен кездешип, экөө чогуу ырдашканы тууралуу маалымат бар. Бирок алардын алым-сабак айтышы сакталып калган эмес.