Кыргыз премьер-лигасындагы футбол командаларынын саны көбөйөт. Учурда өлкө чемпионатында 10 клуб беттештерди өткөрүп келсе, кийинки жылы Каракол жана Өзгөн шаарларынын командалары жогорку лиганы толуктайт. Бул тууралуу Нурдин Букуев Sputnik Кыргызстан радиосуна маек куруп жатып билдирди.
Анын айтымында, КФБ алдыңкы бир-эки жылда инфратүзүмдү жакшыртууга көңүл буруп, бардык шартты түзүүгө аракет көрөт.
"Жакында эле өлкө башчысы Садыр Жапаров Кыргыз футбол биримдигинин улуттук футбол академиясын жана Бишкектин четиндеги Орок айылында жайгашкан окуу-машыгуу базасын ачты. Ачылыш аземге Азия футбол конфедерациясынын (АФК) президенти да катышкан. Футболду өнүктүрүү бири-бирине байланган комплекстүү иш. Инфратүзүмдү жакшыртуу аркылуу машыгуу сапатын жогорулатып, атаандаштыкты күчөтүп, командалардын көбөйүшүнө, мыкты адистерди даярдоого өбөлгө түзө алабыз. КФБ алдыңкы бир-эки жылда инфратүзүмдү жакшыртууга көңүл буруп, бардык шартты түзүүгө аракет көрөт. Мындан тышкары, Кыргыз премьер-лигасындагы футбол командаларынын санын көбөйтүү керек. Учурда өлкө чемпионатында 10 клуб беттештерди өткөрүп келсе, кийинки жылы Каракол жана Өзгөн шаарларынын командалары жогорку лиганы толуктайт. Албетте, футбол адистерин даярдоо иши олуттуу жүрүп, кадр маселесине басым жасалышы абзел", — деди Букуев.
Ошондой эле ал республиканын ар бир облусунда инфратүзүмдүк өзгөрүүлөр болуп, академиялардын саны көбөйөрүн кошумчалады.