Кыргызстан Кытайдан келе турган туристтик топтор үчүн визасыз режим киргизди. Бул тууралуу министрлер кабинетинин төрагасынын орун басары Эдил Байсалов билдирди. Өкмөттүн маалымат кызматы Байсалов Кытайда өтүп жаткан "Кытай — Борбордук Азия" 11-кызматташтык форумунун алкагында өлкөнүн Элдик саясий консультациялык кеңешинин Бүткүл кытайлык комитетинин төрагасынын орун басары, Бүткүл кытайлык аялдар федерациясынын төрайымы Шэнь Юэюэ менен жолугушканын кабарлаган. "Байсалов Кыргызстан Кытайдан келе турган туристтик топтор үчүн 21 күнгө чейинки мөөнөткө визасыз режим киргизилгендигин билдирди. Бул чара элдик дипломатия тармагындагы кызматташтыкты өркүндөтөт жана Кыргызстандын бүгүнкү күндө эң популярдуу туристтик рыногу үчүн жагымдуулугун жогорулатат", — деп айтылат маалыматта.
Жогорку Кеңеште пенсияга чыгып иштеп жүргөндөрдү тоскоолдуксуз жумуштан алуу сунушталды. Эмгек кодексинин долбоорун талкуулоо учурунда депутат Кундузбек Сулайманов айрым мекемелерде 80 жаштагы адамдар иштеп жатканын белгилеп, иш берүүчүлөргө пенсионерлерди жумуштан кетирүүгө укук берүүнү сунуштады. "Пенсия курагына жеттиби, андан кийинки кадрларды жумуш менен камсыз кылалы. Жетекчи мыйзам чегинде кол алдындагы пенсионерлерди жумуштан кетире албай жатат", — деди эл өкүлү. Буга утурлай, Улуттук илимдер академиясынын вице-президенти Чолпонкул Арабаев бул маселе орчундуу экенине токтолду. Анын айтымында, академияда дагы пенсия курагындагылар жаштарга орун бошотпой келет.
Нарын облусунун Жумгал районунда жол кырсыгы катталып, үч киши каза болду. Маалыматты Жол кыймылы коопсуздугун камсыздоо башкы башкармалыгынан тастыкташты. Жол кырсыгынын видеосунда оор жүк ташуучу унаа менен Honda CR-V сүзүшүп, кийин оор жүк ташуучу унаа алдында бараткан Audi унаасын сузгон. Кырсыктын видеосун жергиликтүү тургун тартып, соңку маалда Жумгал менен Кочкордо жол кырсыгы көбөйүп кеткенин жазган.
Грузиянын президенти Саломе Зурабишвили жана оппозициялык партиялар төңкөрүшкө жол ачуу үчүн парламенттик шайлоонун жыйынтыгын легитимсиз деп аташууда. Бул тууралуу парламенттин спикери Шалва Папуашвили брифингде билдиргенин РИА Новости жазды. Бир күн мурун президент Зурабишвили шайлоо толугу менен бурмаланганын айтып, нааразылык акцияларына чыгууга чакырган. Ал Конституция боюнча президенттин эч бир партияга тиешеси болбошу керектигине карабастан, негизги оппозициялык партияларды бириктирүүнүн демилгечиси болгон. "Бул сценарий алдын ала даярдалган. Ага ылайык, шайлоонун жыйынтыгы легитимсиз деп табылышы керек, андан соң техникалык өкмөт түзүлөт. Мунун баары төңкөрүшкө алып барчу жол. Алар ошол жолго Конституцияны бузуу менен бет алды. Бирок Грузия буга жол бербейт", — деди саясатчы. /// ЭМИ ВАЛЮТА КУРСУ МЕНЕН ТААНЫШЫП АЛЫНЫЗДАР: Улуттук банктын билдирүүсү боюнча ушул тапта: 1 АКШ доллары 85 сом 80 тыйынга евро 92 сом 87 тыйынга рубль 89 тыйынга Казак тенгеси 19 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 66 сом 90 тыйындан баштап, 67 сом 40 тыйынга чейин, Аи 95 үлгүсүндөгү күйүүчү май 74 сом 40 тыйындан 75 сом 40 тыйынга чейин, дизель майы 74 сом 80 тыйындан, 75 сом 30 тыйынга дейре, ал эми унаа газынын литри 37 сомдон сатылууда. АБА ЫРАЙЫ 29-октябрга караган түнү жамгыр жаап, карга айланышы күтүлөт. Батыштан соккон шамалдын ылдамдыгы секундасына 4-9, айрым жерлерде 15-20 метрге жетет. Шейшембиде, өлкөнүн айрым аймактарында жамгыр, бийик тоолуу райондордо кар жаашы мүмкүн. Мындай маалыматты Кыргызгидромет таратты. Абанын температурасы Чүй жана Талас аймагында +5...+10, Ош, Жалал-Абад жана Баткен облустарында +9...+14, Ысык-Көл дубанында +5...+10, Нарын өрөөнүндө +3...+8 градус жылуу болот. Күндүн табы борбор калаада +6…+8, Ош шаарында +11...+13 градуска көтөрүлөт.