БИШКЕК, 27-окт. — Sputnik. Келерки жумада өлкө аймагында күтүлгөн аба ырайы тууралуу Кыргызгидромет маалымат берди.
Ага ылайык, көпчүлүк аймактарда октябрдын этеги жаанчыл болсо, ноябрдын башында аз да болсо күн ачылат.
Бишкекте 28-29-октябрда түнкүсүн жана 30-октябрда мезгил-мезгили менен жаан жаашы күтүлөт. Калган күндөрү күн ачык болот.
Батыштан соккон шамалдын ылдамдыгы секундасына 28-октябрда 14 метрге жетет.
Чүй, Талас
Аймактарда 28-29-30-октябрда көпчүлүк аймактарда жаан, тоолуу райондордо кар жаайт. Ал эми 31-октябрда жана 1-2-ноябрда күн ачылат.
Бийик тоолуу райондордо жолдор тоңуп тайгак болот. Батыштан соккон шамалдын ылдамдыгы секундасына 4-9 метрге жетет. Ал эми 28-октябрда айрым жерлерде 15-20 метрге жетери айтылды.
Ош, Жалал-Абад, Баткен
Түштүк аймактарында дагы жуманын баш жагы жаан-чачындуу болуп, андан кийин күн ачыла баштайт.
Бийик тоолуу райондордо жолдор тоңголок жана тайгак болот. Батыштан соккон шамалдын ылдамдыгы секундасына 4-9 метрге жетет. Ал эми 28-октябрда айрым жерлерде 15-20 метрге жетиши мүмкүн.
Ысык-Көл, Нарын
Жуманын башы, тагыраагы, 28-29-30-октябрда жаан-чачын жаап, тоолуу райондорго кар түшөт. Жолдор тоңуп тайгалак болот. Андан кийинки күндөрү күн ачылат.
28-октябрда айрым жерлерде шамалдын ылдамдыгы 15-20 метрге жетиши күтүлөт.