Көпчүлүк адамдар наркоздон кийин саламаттыгы начарлап кетет деп кооптонушат. Чындыгында бул андай эмес. Операция үчүн медиктер колдонгон препараттар толугу менен организмден чыгып кетет жана ал эс тутумга же организмдин башка функцияларына терс таасирин тийгизбейт. Бул тууралуу Гүлбара Кабулова Sputnik Кыргызстан радиосуна маек куруп жатып билдирди.
Анын айтымында, учурда медицинанын өнүгүүсү менен анестезиологдор түрдүү препараттарды колдонуп калышты.
"Айрым бейтаптар операциянын өзүнө караганда наркоз алгандан коркорун айтышат. Алар наркоз организмге зыян, эс тутум начарлайт, өмүр кыскарат деген сыяктуу жүйөлөрдү келтиришет. Бирок андай эмес. Наркоз бир нече убакыттан кийин организмден толугу менен чыгып кетет. Азыр түрдүү жаңы препараттар чыгып калды. Аларды ийне сайбай деле ингаляциялык жол менен берсе болот. Бейтаптардан эмнеге наркоздон чочулашарын сураганда, ойгонуп жатканда кыйналгандарын айтышат. Бул жерде бейтаптын психологиялык, эмоционалдык абалы өтө маанилүү. Башкача айтканда, наркоз аларда кандай маанайда болсо, ошондой эле абалда ойгонот. Башкача айтканда, коркуп, чочулап, сарсанаа болуп жатып наркоз алгандар ыйлаган, корккон абалды башынан өткөрүү менен өздөрүнө келишет. Тескерисинче, наркоз сайылар алдында чочулабай жаткандар жеңил чыгат", — деди Кабулова.
Ал анестезиологдор наркоз саярдан мурда бейтаптардын психикалык-эмоционалдык абалына көңүл бурушу зарылдыгын кошумчалады.