Кыргызстан адилеттүү жана басмырлоосуз эл аралык экономикалык тартипти жактайт. Бул тууралуу президент Садыр Жапаров Казанда өтүп жаткан БРИКС+ саммитинин кеңейтилген форматтагы жыйынында билдирди. Анын айтымында, тандалмалуу өлкөлөр эл аралык сооданы тескеп, каржы системасындагы манипуляциялоо аркылуу байып жатат. "Учурда эл аралык укук иштебей эле күчтүүлөрдүн үстөмдүгү күч алып жатат. Барган сайын жаңы ажырым жараткан сызыктар пайда болуп, жаратмандыкка жана жакырчылыкты жеңүүгө жумшаса боло турган каражаттар куралданууга сарпталууда", — деди мамлекет башчы. Президент Кыргызстан адилеттүү жана басмырлоосуз эл аралык экономикалык тартипти, дүйнөлүк экономиканын жыргалчылыктарына жана заманбап технологияларга жеткиликтүүлүктү жактай турганын айтты. Ошондой эле дүйнөдөгү геосаясий абалдын курчушуна карабай Кыргызстан туруктуу өнүгүү чараларын көрүп, экономикасы өсүп жатканын белгиледи.
Төлөм уюмдарынын жана төлөм системаларынын операторлорунун уставдык капиталынын минималдуу өлчөмүн көтөрүү сунушталды. Тиешелүү токтом долбоору коомдук талкууга чыгарылды. Ага ылайык, 2019-жылдан 2023-жылга чейин төлөмдөрдүн көлөмү 11,5 эсеге өсүп, тобокелдиктерди күчөткөн. Мындан улам жаңы уставдык капиталдын минималдуу өлчөмү боюнча талапты өзгөртүү каралууда. Жаңы түзүлгөн төлөм системаларынын уставдык капиталынын минималдуу өлчөмүнө токтолсок: төлөм системасынын операторлорунуку — 20 миллион сомдон кем эмес, төлөм уюмдарыныкы — 30 миллион сомдон кем эмес болсо, экөөнүн ишин айкалыштырган жактардыкы — 50 миллион сомдон кем эмес деп белгиленген. Мындан тышкары, төлөм карталары аркылуу жана чек ара аралык төлөмдөрдү кабыл алган финансылык уюмдар үчүн 60 миллион сомдон 110 миллион сомго чейинки минималдуу чек коюлган.
Жогорку Кеңеште Ысык-Көлдө гидроциклдерди колдонууга тыюу салуу мыйзамы биринчи окууда жактырылды. Аны депутат Элдар Сулайманов демилгелеген. Мыйзам долбооруна ылайык, гидроциклдерди иштеткени үчүн жеке жактарга 5 миң сом, юридикалык жактарга 10 миң сом айып салынат. Бул аракет кайталанса жеке жактарды 15 миң, юридикалык жактарды 20 миң сом айыпка жыгуу сунушталууда. Демилгечи мыйзам долбоорунун максаты эс алуучулардын коопсуздугун камсыздоо жана экологияга терс таасирди азайтуу экенин белгилеген.
2026-жылга чейин мобилдик банкинг аркылуу акча которууларга комиссия алынбайт Улуттук банк бүгүн, 24-октябрда, токтом кабыл алды. Ага ылайык, 2025-жылдын 31-декабрына чейин коммерциялык банктар жана төлөм уюмдары тарабынан мобилдик тиркемелер жана интернет банкинг аркылуу улуттук валютада жеке кардарлардын акча которуулары үчүн комиссия алынбайт. Бул чаралар өлкөдө накталай эмес төлөмдөрдүн үлүшүн арттырууга шарт түзөрү айтылган. Токтом жарыялангандан бир айдан кийин күчүнө кирет.