18-22-октябрга чейин Москва жана Санкт-Петербург шаарларында Кыргызстандын аткаруучулары, сүрөтчүлөрү, кинорежиссерлору жана чыгармачыл топтору Маданият күндөрүнүн алкагында кино жана адабияттан тарта живопись жана балетке чейинки заманбап искусствонун бардык спектрин тартуулашты.
Россиянын маданият министринин орун басары Андрей Малышев азыркы Россиянын тарыхында мындай масштабдагы башка өлкөнүн маданият күндөрү өткөрүлбөгөндүгүн белгиледи.
"Россияга бир тууган Кыргызстандан 350дөн ашык артист келди. Бул фантастикалык окуя. Кыргыз киносу тууралуу айтсак, россиялык көрүүчүлөр Кыргызстанда искусствонун бул түрү жогорку деңгээлде экенине жана бүткүл дүйнө жүзүнүн кызыгуусун жаратарына күбө болушту", — деди Малышев.
КР маданият, маалымат, спорт жана жаштар саясаты министринин орун басары Тимурлан Ажымалиев Россиядагы миңдеген кыргызстандыктар мекендештеринин концертине келишкенин белгиледи.
"Өлкөбүздүн Россиядагы маданият күндөрү абдан ийгиликтүү өттү. Бардык концерттер менен көргөзмөлөргө көп сандаган орус көрүүчүлөрү келди. Россиялыктар Кыргызстандын маданиятына абдан кызыкдар экенин түшүндүк", — деди министрдин орун басары.