Жогорку Кеңеште "Тынчтык жөнүндө" жана "Укук бузуулар жөнүндө кодекске өзгөртүүлөрдү киргизүү тууралуу" мыйзам долбоорлору каралып, кабыл алынды. Ага үчүнчү окууда каттоодон өткөн 78 депутаттын ичинен 62си "макул" деп добуш берди. Мыйзам долбоору мындай талаптарды белгилөөнү сунуштайт: ызы-чуудан корголгон жайлардын жана аймактардын болушу; тынчтыктын жана бейпилдиктин бузулушуна алып келген аракеттерге жоопкерчилик; жарандардын тынчтыгын жана эс алуусун бузууга жол бербей турган убакыт мерчемдери. Долбоор боюнча ызы-чуу жасагандарга милиция чара көрүүгө укуктуу болот. Ошол эле учурда мыйзам түнкүсүн айтыла турган азандарга тиешеси жок экени белгиленген.
Өлкө башчы Садыр Жапаров Кыргыз футбол биримдигинин улуттук футбол академиясын ачканын президенттин маалымат кызматы кабарлады. Билдирмеге караганда, ачылыш аземге Азия футбол конфедерациясынын президенти шейх Салман бин Ибрагим Аль-Халифа да катышкан. Академия 3,4 гектар аянтты ээлеп, анда футбол талаалары, машыгуу аянтчалары, мейманкана комплекси, футзал оюндарын өткөрүү үчүн спорт зал, трибуналар, кафетерий жана башка заманбап объектилер бар. Академия эл аралык жана жергиликтүү уюмдардын, анын ичинде ФИФА, Азия футбол конфедерациясы, Футболду колдоо фондунун жана Кыргыз футбол биримдигинин каржылык колдоосу менен салынганы белгиленди. Азыркы академиянын ордунда буга чейин шаардык полигон жайгашкан. Ал жер мамлекеттин жана өнөктөштөрдүн аракети менен тазаланып, футбол комплекси пайда болгону кошумчаланды.
Кыргызстандык жаш балбан Раззак Бейшекеев дүйнө чемпиону болуп, тарых жаратты. Спортчу Албанияда өтүп жаткан 23 жашка чейинки балбандар арасындагы грек-рим күрөшү боюнча дүйнө биринчилигин утуп, бул категорияда Кыргызстандын капчыгына алтын алып келген алгачкы балбан болду. Раззак Бейшекеев грек-рим күрөшү боюнча 67 килограмм салмак ченинде күрөшүп, финалга чейин албаниялык, азербайжандык, япониялык, польшалык төрт атаандашын чоң айырма менен жеңген. Чечүүчү кармашта грузиялык атаандашы Диего Чхиквадзени 6:1 эсебинде утту.
Жамааттык Батыш Россияга жеңилгенин моюнга алгысы жок, ал эми РФтин экономикасы өсүп, татаал шартка ыңгайлашып жатат. Бул пикирин РИА Новостиге геосаясий аналитик Пепе Эскобар айткан. "Вашингтон Россия жалпы Батыш менен кармашып жатканын моюнга алгысы келбей жатат. Ал улам жеңип баратат. Россиялык экономика күчтүү, Европанын башка мамлекеттерине караганда тез өнүгүп бара жатат. Россия Азия менен соода алакаларын кайрадан карап, жолго салып чыкты", — деген Пепе Эскобар. РФ Батыштын тоскоолдуктарын кабылдап, бирок өзүнүн ыңгайына жараша пайдалангандыгын белгилеген. "Андыктан бардыгы Россияга каршы ат коюшту, Россия муну кабылдап, өзүнө ыңгайлаштырып алды. Муну батыштагылардын моюнга алгысы жок. Себеби баарынын менталитети бирдей. Улуу держава катары Россияны жактырбай турушат", — деп оюн жыйынтыктаган серепчи.