Көп векторлуу тышкы саясат Кыргызстандын өзгөрүүсүз принциби бойдон калат. Бул тууралуу президент Садыр Жапаров Тышкы иштер министрлигинин 80 жылдык мааракесинде билдирди. Анын айтымында, өлкө ынак коңшулук мамилелерди чыңдоо үчүн чек ара маселелерин чечүүгө өзгөчө көңүл бурууда. "Ынак коңшулук мамилелерди чыңдаш үчүн чек ара маселелерин чечүүгө өзгөчө көңүл буруп жатабыз. Биз Азия, Европа жана Америка өлкөлөрү, мусулман дүйнөсү менен мамилелерди өнүктүрөбүз, ошондой эле Африка, Латын Америкасы жана Океания мамлекеттери менен дипломатиялык байланыштарды жана кызматташууну уланта беребиз", — деп айтылат өлкө башчынын куттуктоосунда. Ошондой эле ал Кыргызстан БУУнун алкагында саясий диалогго жана кызматташууга өзгөчө көңүл буруп жатканын кошумчалаган.
Ошто Кыргызстан жана Россия мугалимдеринин II форуму өтүп жатат. Россиянын элчилигинен кабарлашкандай, иш-чара Ош мамлекеттик университетинин базасында 23-октябрга чейин уланат."Кечээ форумдун ачылышы болуп, ага президенттин Ош облусундагы өкүлүнүн орун басары Талантбек Арстанкулов, Ош шаарынын вице-мэри Нурбек Кадыров, Баткен мамлекеттик университетинин ректору Айдарбек Гыязов, Башкыр мамлекеттик педагогикалык университетинин ректору Салават Сагитов, Россотрудничествонун жана РФтин Ош шаарындагы Башкы консулдугунун өкүлдөрү катышты", — деп айтылат маалыматта.
Украинанын Тышкы иштер министрлиги X социалдык тармагындагы баракчасы аркылуу Украина боюнча июнь айында Швейцарияда өткөн конференцияга баруудан баш тартып, бирок Казандагы БРИКСтин саммитине катыша турган БУУнун баш катчысы Антониу Гутерришке таарынычын билдирди. Бул тууралуу РИА Новости жазды. Буга чейин Россиянын тышкы иштер министринин орун басары Сергей Вершинин РИА Новостиге билдиргенине караганда, БУУнун баш катчысы Казанда өтүүчү БРИКС саммитине катышарын ырастады. 24-октябрда саммиттин алкагында Россиянын президенти Владимир Путин менен БУУнун баш катчысы Антониу Гутерриштин жолугушуусу болору да мурда белгилүү болгон. Анда БУУнун ишмердүүлүгүнүн темалары менен катар эл аралык күн тартибиндеги актуалдуу маселелер, анын ичинде Жакынкы Чыгыш кризиси жана Украинанын айланасындагы кырдаал да каралары күтүлүүдө.