БИШКЕК, 21-окт. — Sputnik. Түркияда 2016-жылы төңкөрүш аракетин уюштурган деп айыпталган дин аалымы Фетхуллах Гүлен каза болгонун Hurriyet гезити жазды.
"FETO лидери, Американын Пенсильвания штатында жашаган Фетхуллах Гүлен каза болду", — деп айтылат басылманын маалыматында.
Түрк бийлиги FETO (Фетхуллахчы террордук уюм) деп атаган Гүлендин уюмун 2016-жылдын июлундагы төңкөрүш аракетине тиешеси бар деп айыптап келет. Түркияда көтөрүлүштөн кийин 80 миңден ашуун адам камакка алынган, 150 миңдей мамлекеттик жана аскер кызматкерлери жумуштан бошотулган же четтетилген. АКШда жүргөн Гүлен төңкөрүштү айыптап, өзүнө тагылган күнөөлөрдү четке каккан.