БИШКЕК, 21-окт. — Sputnik. Кыргызстандын энергетикадагы аялдар ассоциациясынын мүчөсү Айдай Керимкулова БРИКС өлкөлөрүнүн аялдар стартаптарынын биринчи сынагында "50 МВт кубаттуулуктагы күн электр станциясын куруу" долбоорун сунуштап, жеңүүчү болду. Бул тууралуу ассоциациянын маалымат кызматы билдирди.
© Фото / Ассоциация женщин в энергетике Кыргызстана
Иш-чара 18-октябрда Москвада өткөн БРИКСтин бизнес-форумунун алкагында өтүп, ага 30 өлкөнүн компаниялары катышты. Миңден ашык өтүнмөнү эл аралык калыстар тобу караган. Дүйнө боюнча 14 өлкөнүн долбоорлору БРИКСтин аялдар бизнес-альянсы тарабынан коммуникациялык колдоо алат.
"Альянстын экосистемасы жеңүүчүлөргө инновациялык стартаптарын кеңейтүүгө, каражат тартууга жана жаңы рынокторго чыгууга жардам берет", — деп белгиледи альянстын россиялык бөлүгүнүн төрайымы Анна Нестерова.
Кыргызстандын энергетикадагы аялдар ассоциациясынын жетекчиси Алтынай Абдыкеримова энергиянын кайра жаралуучу булактары багытында иш жүргүзгөн аялдарды колдоо маанилүү экенин белгиледи.