Чаткал районунун Ак-Сай аймагында кар көчкү алдында калды деп изделип жаткан алты адамдын баары каза тапканы анык болду. Тагыраагы, ӨКМ бүгүн кайрадан издөөгө киришип, калган үч адамдын сөөгүн тапканын кабарлады.Эске салсак, алардын ичинен үч адамдын сөөгү кечээ,18-октябрда, табылып, тик учак менен Кум-Бел тилкесиндеги штабга жеткирилген. "Бүгүн табылган үч кишинин сөөгүн куткаруучулар ИИМ кызматкерлерине жана туугандарына өткөрүп берип жатышат", — деп билдирди министрликтен. Эске салсак, 9-октябрда 14 адам дары чөптүн (эндиктин) тамырын казып алуу үчүн тоого чыгып кетип, ошол боюнча байланышка чыкпай калышкан. ӨКМдин райондогу бөлүмүнүн кызматкерлери издөөгө чыгып, сегиз киши аман-эсен табылган. Ал эми алты адам кар көчкүнүн алдында калганы айтылган эле.
Бишкектин прокурорунун орун басары, шаардык прокуратуранын бөлүм башчысынын орун басары жана Аскер лицейинин юристи кармалып, УКМКнын тергөө абагынын убактылуу кармоо жайына киргизилди. Бул тууралуу Sputnik агенттигинин ишенимдүү адамдары маалымдашты. Эске салсак, кечээ алардын УКМКда сурак берип жатканы белгилүү болгон. Алдын ала берилген маалыматтарда, үчөө Бишкектин вице-мэри Рамиз Алиевден опузалап пара талап кылган деп шектелүүдө. Кеп 5 миң доллар туурасында жүрүп жатат. Белгилей кетсек, буга чейин Бишкек шаарынын прокуратурасы "Тазалык" муниципалдык ишканасын текшерип, ишкананын айрым кызматкерлерине 134,2 тонна күйүүчү-майлоочу майды мыйзамсыз берип, жалпы суммасы 7 млн. 179 миң 498 сомду түзгөн бюджеттик каражатты кымырып алуу фактыларын аныктаган.
Евразия экономикалык бирикмеси Кытай менен кызматташуу боюнча макулдашты. Бул тууралуу ЕАЭБдин иштиктүү кеңеши билдирди. Аталган кеңеш менен Кытайдын эл аралык сооданы илгерилетүү боюнча комитетинин ортосунда кол коюлган меморандум ЕАЭБ өлкөлөрү менен Кытайдын ортосундагы тоскоолдуктарды жоюуга жана бизнес байланыштарын мындан ары өнүктүрүүгө мүмкүндүк берет. Меморандумга Россиянын өнөр жайчылар жана ишкерлер союзунун президенти, ЕАЭБ иштиктүү кеңешинин президиумунун мүчөсү Александр Шохин жана Кытайдын эл аралык сооданы илгерилетүү боюнча комитетинин төрагасынын орун басары Чжан Шаоган кол коюшту.
Владимир Зеленский мобилизациялангандардын курагы дагы төмөндөсө өлкөдөн жаштар чыгып кетиши мүмкүн деген кооптонуулар тууралуу суроого жооп берип жатып, жаштар Украинадан качып жатканын мойнуна алды. Бул тууралуу РИА Новости жазды. Зеленский Украинанын Батыштагы бир катар өнөктөштөрү өлкөдө мобилизациялай турчулардын жашын төмөндөтүүнү каалап жатканын моюнга алган. Бирок азырынча Киевдин мындай планы жок. Жума күнү Украинанын Коргонуу министрлигинин башчысы Рустем Умеров Киев эмне үчүн 18 жаштан 25 жашка чейинкилерди фронтко жибербей жатканын билүү үчүн АКШ украин бийлиги менен мобилизациялана тургандардын жашын төмөндөтүү маселесин талкуулап жатканын айткан. Буга чейин украиндердин Дүйнөлүк конгрессинин билим берүү кеңешинин жетекчиси Любовь Любчик 2022-жылдан бери 1 миллиондон ашык мектеп окуучусу Украинадан чыгып кеткенин билдирген.