Президент Садыр Жапаров "Ынтымак" турак жай комплексинин курулушуна "мезгил кутусун" салды. Бул тууралуу өлкө башчынын маалымат кызматынан кабарлашты.Ага ылайык, батирлердин жарымы кезекте турган социалдык багыттагы кызматкерлерге жеңилдетилген шартта берилет, ал эми калганы 50 пайыз үлүш кошуу шарты менен мигранттар жана башка жарандарга арналган. Жалпы аянты 18 гектар жерге 18 кабаттуу үйлөрдү куруу пландаштырылууда. Комплекстин инфратүзүмүндө жолдор, мектеп, эки бала бакча, жашылдандыруу жана унаа токтотуучу жайлар камтылып, көп кабаттуу үйлөрдүн биринчи кабатында коммерциялык жайлар жайгашат. Бүгүнкү күндө Бишкекте 22 мин 573 адам кезекте турган болсо, региондордо 15 400 адам бар. Жалпы республика боюнча азыркы тапта 42 316 батир салынып жатат. Мамлекет башчы иш-чаранын катышуучуларына 2028-жылдарга чейин өлкө боюнча бардык муктаж болгон жарандарды турак жай менен камсыз кылуу максаты коюлганын айтты.
Бишкектеги мугалимдердин айлыгына берилчү каражат эми шаардык эмес, республикалык бюджеттен төлөнөт. Бул тууралуу парламенттик фракциялардын жыйынында финансы министри Алмаз Бакетаев билдирди. Анын айтымында, буга короп жүргөн шаардык бюджеттин каражаты башка максаттарга колдонулмакчы. "2025-жылы Бишкектин бюджетиндеги 3 миллиард сом, 2026-жылы 6,5 миллиард сом бошотулат. Каражат толугу менен мэрияда калып, шаарды өнүктүрүүгө жумшалмакчы", — деди Бакетаев. Буга чейин борбор калаадагы мугалимдердин эмгек акысы Бишкек мэриясынын бюджетинен алынчу.
Өзгөчө кырдаалдар министрлиги билдиргендей, Чаткалда кар көчкү алдында калган алты жарандын төртөөнүн сөөгү табылды. Маалыматка ылайык, табылган төрт жарандын сөөгү тик учак аркылуу Кумбел тилкесиндеги штабга жеткирилди. Калган жарандарды издөө иштери уланууда. Куткаруу иштерине ӨКМдин тик учагы, куткаруучулар жана атайын техникалар тартылган. Жергиликтүү тургундарга жана жабыркагандардын үй-бүлөлөрүнө зарыл колдоо көрсөтүлүп, издөө-куткаруу иштери үзгүлтүксүз жүргүзүлүүдө.
БРИКСтин дүйнөлүк экономикадагы ролу бүгүнкү күндө эле эмес, келечекте да арта турганы айкын болуп калды. Бул туурасында РФ лидери Владимир Путин Москвада өткөн БРИКСтин иштиктүү форумунда билдирди.Ал бирикмеге кирген өлкөлөр чындыгында экономикалык өсүүнүн алдыга жетелөөчүсү болуп саналарын, БРИКС жакынкы келечекте дүйнөлүк ички дүң продукциянын негизги өсүшүн жаратарын айтты. "Бирикменин алкагында өнүгүү үчүн тиешелүү платформалар түзүлөт — бул байланыш каналдары, технологиялык жана билим берүүнүн стандарттары, финансылык системалар, төлөм каражаттары, ошондой эле узак мөөнөттүү инвестицияларды туруктуу камсыз кылуу механизмдери. БРИКС мүчөлөрүнүн экономикалык өсүшүндө сырттан кийлигишүүгө жана таасирге көз карандылык мындан ары азаят", — деди Путин. БРИКС — 2006-жылы түзүлгөн мамлекеттер аралык бирикме. Россия 2024-жылдын 1-январынан тарта уюмга төрагалык кылууда. БРИКС саммити 2024-жылдын 22-24-октябрында Казань шаарында болот.