БИШКЕК, 14-окт. — Sputnik. АКШ президенти Жо Байден дүйнө өзөктүк куралдан биротоло баш тартышы керектигин, Америка Россия, Кытай жана Түндүк Корея менен ушул багытта сүйлөшүүгө даяр экенин билдирди. Анткен менен өлкө башчысы АКШ өзүнүн өзөктүк арсеналын бекемдөө үчүн канча каражат жумшап жатканын айткан жок. Бул тууралуу РИА Новости жазды.
"Биз ааламды биротоло өзөктүк куралдан арылта турган күнгө умтула беришибиз керек. Кошмо Штаттар өзөктүк кооптуулукту азайтуу үчүн Россия, Кытай жана Түндүк Корея менен сүйлөшүүгө даяр", — деп жазылат америкалык лидердин билдирүүсүндө.
Байден "өзөктүк арсеналды кыскартуу процессине жолтоо болуудан" жогорудагы мамлекеттер пайда таппай турганын белгилеген.
АКШ президенти билдирүүсүн Нобель сыйлыгын тапшырууга байланыштуу жасаганы айтылды. Буга чейин 2024-жылы сыйлык Хиросима менен Нагасакини бомбалоодон кийин аман калган "Нихон Хиданкё" уюмуна бериле турганы белгилүү болгон.
Анткен менен АКШ лидери өзөктүк курал-жарагын бекемдөөгө өлкө бийлиги канча каражат жумшап жатканын сөз кылган эмес.
АКШнын ушул жылдын 1-октябрында башталган жаңы финансылык жылында федералдык бюджеттен стратегиялык кармап туруу күчтөрүн өнүктүрүүгө 49 миллиард доллар бөлүү каралган. Мындан тышкары, америкалык Конгресстин бюджет башкармалыгынын эсеби боюнча, АКШнын өзөктүк күчүнө 2023-2032-жылдар аралыгында 756 миллиард доллар сарптоо пландалган.
АКШ администрациясы 2026-жылдын февралында аягына чыга турган стратегиялык чабуул коюучу курал-жарак тууралуу россиялык-америкалык келишимди узартуу ниетин билдирип, Россия президенти Владимир Путиндин чечимин күтүп жатканын айткан.
Мындай "эл көзүнө" жасалган дипломатия Киевге куралдуу жардам көрсөтүү жана Россияны стратегиялык жеңилүүгө дуушар кылуу аракети менен коштолуп келет. Андан сырткары, АКШ Европага Киев үчүн деп байма-бай курал-жарак жөнөтүүдө, эми Германияга ыраакка атылуучу системаларды жайгаштырууну көздөп жатат.
РФ ТИМи Москва АКШнын антироссиялык көз карашы өзгөрмөйүнчө стратегиялык чабуул коюучу курал-жарак тууралуу сүйлөшүүлөрдү жандандырууга даяр эмес экенин ачык айтып келет. Октябрь айында РФ президентинин маалымат катчысы Дмитрий Песков сүйлөшүүлөр өзгөрүп жаткан кырдаалды эске алуу менен жүрүшү керектигин билдирген. Анын айтымында, Европанын аскерий-өзөктүк инфраструктурасын эсепке албай, Европа мамлекеттерин четте калтырып жана стратегиялык коопсуздуктун башка бир элементтери тууралуу кеп козгобой туруп сүйлөшүүлөрдү жүргүзүү дээрлик мүмкүн эмес.