БИШКЕК, 11-окт. — Sputnik. Европанын экономикалык, саясий, ал тургай нравалык абалынын начарлашынын фонунда анын рыногу Кыргызстан үчүн келечектүү боло албайт. Бул тууралуу эл аралык мамилелер боюнча эксперт Эсен Усубалиев билдирди.
Ал Бишкекте өтүп жаткан "БРИКС алкагындагы Кыргызстан менен Россиянын стратегиялык өнөктөштүгү" аталышындагы тегерек столго катышкан.
Эксперт акыркы 15-20 жылдан бери Европа рыногу келечектүү деп айтылып, эмнегедир артыкчылыктуу сезилгенин белгиледи.
"Албетте, Европанын экономикалык, саясий жана нравалык жактан абалынын начарлап баратканын эске алганда, анын рыногу биздин ишкерлерди кызыктырат, бирок келечеги жок. Статистикага караганда, биз үчүн евразиялык рынок артыкчылыктуу, буга кошумча, БРИКС дагы бар", — деди Усубалиев.
Ал Европа өлкөлөрү менен байланышкан долбоорлор, мисалы, "Орто коридор" бар экенин эске салды.
"Албетте, алардан баш тартпайбыз, бирок Түштүккө, Чыгышка багыт алган пайдалуураак, БРИКС бул мүмкүнчүлүктү бере алат", — деп кошумчалады эксперт.