БИШКЕК, 10-окт. — Sputnik. Көмүр кенге уруксатсыз жол салып, мөңгүнү талкалагандарга кылмыш иши козголду. Бул тууралуу Башкы прокуратурадан кабарлашты.
© Фото / предоставлено Эламаном Карымшаковым
Маалыматка ылайык, "К.К." мамлекеттик ишканасынын "Түштүк" филиалынын кызмат адамдары мыйзам бузганы аныкталган.
"Шектүүлөр "С" ЖЧКсынын өкүлдөрү менен алдын ала сүйлөшүп, Ош токой чарбасынын Загара-2 тилкесинде узундугу 6 миң 100 метр, туурасы 9 метрлик (29 400 м2) жолду мыйзамсыз кургандыгынын натыйжасында 9 миң 392 чарчы метр аянттагы мөңгү талкаланып, жер кыртышы бузулган", — деп айтылат маалыматта.
Факт боюнча "Кызмат абалынан кыянаттык менен пайдалануу" жана "Иштерди жүргүзүүдө айлана-чөйрөнү коргоо эрежелерин бузуу" беренелери менен кылмыш иши козголду.
Мамлекетке келтирилген зыяндын көлөмү экспертизалардын жыйынтыгы менен белгилүү болору кошумчаланды.