БИШКЕК, 2-окт. — Sputnik. Израилдин тышкы иштер министри Исраэль Кац БУУнун баш катчысы Антониу Гутерришти нон-грата адамы деп жарыялап, өлкөгө кирүүгө тыюу салды. Бул тууралуу Израиль ТИМинин 2-октябрдагы билдирүүсүндө айтылат.
Тель-Авив мындай чечимди Ирандын Израилдин аймагына жасаган ракеталык чабуулуна карата Гутерриштин реакциясынан кийин кабыл алганы белгиленди.
Кац Гутерриштин жүрүм-туруму согуш башталгандан бери "Хамас" жана "Хезболла" сыяктуу террордук уюмдарды колдоп жатканын көрсөтүүдө деген пикирде.
"Ирандын Израилге жасаган кылмыштуу чабуулун ачык айыптай албаган адам Израилдин жерине бут басууга татыктуу эмес. Кеп 7-октябрда "Хамас" тарабынан жасалган кыргынды жана сексуалдык кылмыштарды айыптай элек башкы катчы тууралуу болуп жатат", — деп айтылат билдирүүдө.
Кац "Хамастын", "Хезболланын", хусиддердин террорчуларын, зордукчуларын жана канкорлорун, эми глобалдык терроризмдин кемеси болгон Иранды колдогон башкы катчы БУУнун тарыхындагы кара так катары каларын кошумчалаган.
Буга чейин Антониу Гутерриш X социалдык тармагындагы баракчасы аркылуу Жакынкы Чыгыштагы чыр-чатактын күчөшүн айыптап, тараптарды ок чыгарууну токтотууга чакырган. Бирок ал Израиль же Иран тууралуу ооз ачкан эмес.
Эске салсак, 1-октябрдын кечинде Иран Израилге 200дөн 500гө чейин ракета учурган. Ислам революциясынын сакчылар корпусу ракеталык сокку Ирандын союздашы, "Хезболланын" лидери Хасан Насрулла менен ХАМАСтын жетекчиси Исмаил Ханияны өлтүрүүгө жооп иретинде жасалганын билдирди.