БИШКЕК, 1-окт. — Sputnik. Иран Израилдин аскердик объектилерине гана чабуул жасады. Бул туурасында БУУдагы Иран миссиясы билдирген.
Эске салсак, түндө бул мамлекет Израилге абадан ракеталык сокку жасаган.
Айрым ЖМКлардын билдирүүсүнө караганда, Израиль тарапка 400дөй снаряд атылган. Ал эми Иран 200дөй баллистикалык ракета кое бергенин айткан.
ЖМКлар бул пландалган чабуулдардын экинчи толкуну экенин кабарлап, Израилдин аймагындагы маанилүү аскердик объектилерге чабуул коюлганын маалымдашты.
Ал эми Бириккен Улуттар Уюмунун Коопсуздук кеңеши Жакынкы Чыгыш боюнча кечинде (Бишкек убактысы боюнча саат 20:00) чукул жыйын өткөрмөкчү.
Ирандын Куралдуу күчтөрүнүн башкы штабынын жетекчиси Израилдин Аскердик-аба күчтөрүнүн эки базасына жана "Моссад" чалгындоо кызматынын штаб-квартирасына сокку урулганын билдирди.
Буга жооп болору талашсыз. Ирандын Куралдуу күчтөрүнүн башкы штабынын билдирүүсүндө Израилдин өнөктөштөрү аларга кол салса абал ого бетер чаташарын айтты.
"Израилди колдогон союздаш өлкөлөр, анын ичинде АКШ буга түз киришсе, анда алардын базалары жана Жакынкы Чыгыштагы кызыкчылыктары Ирандын кубаттуу кол салууларына кабылат", — деп Tasnim агенттиги алардын айтканын кабарлады.
Ирандык Fars агенттиги ракеталардын 80 пайызы Израилдин аймагындагы буталарга түшкөнүн жазды.
"Ирандын ракеталарынан израилдик Неватим базасы, F-35 үлгүсүндөгү 20дан ашуун учак жана Тель-Авивдин жанындагы үч база жок кылынды. Бул чабуулда алгачкы жолу гиперүндүү ракеталар колдонулду", — деп жазышты ЖМКлар.
Анткен менен Иран Израилге согуш ачууга ниети https://ria.ru/20241002/iran-1975843198.html жоктугун, бирок азыркы чабуулдарга себептер болгонун айткан.
"Соңку 45 жылда Иран эч кандай согуш отун тутандырган эмес, бирок ал өзүн коргоп, укуктарын сактоодон тайбайт. Кандай гана агрессия болбосун кубаттуу күчү менен жообун берет. Ар бир агрессор кылган ишине өкүнөт", — деп айтылган Башкы штабдын билдирүүсүндө.
Ал эми чабуулга тушуккан Израиль Ирандын аба соккуларынан келтирилген зыян көп эместигин, өлкөнүн Аскердик-аба күчтөрү жабыркабагандыгын айтты.
Wall Street Journal басылмасы Израиль Ирандын бир да соккусун жоопсуз калтырбай турганын жана Ирандын өзөктүк жана мунай объектилерине кол саларын жазды.
Аталган өлкөнүн БУУдагы туруктуу өкүлү Иранды террорчу мамлекет деп атап, алардын жообу бир топ оор болорун айтты.
Бул кырдаалдан кийин Иран, Израиль жана Ирактын аба айдыңы жабылып, ал эл аралык авиакаттамдарга таасирин тийгизди.