"Кыргыз фармация" ишке киргенден бери мурда ооруканаларга тендер менен алынган дарылардын баасы 200-600 пайызга арзандады. Бул туурасында саламаттык сактоо министри Алымкадыр Бейшеналиев "Биринчи радиого" маек берип жатып айткан. Министрдин айтымында, бул дары-дармек чыгарган тарап менен тикелей иштешүүдөн улам болду. "Башка менчик фармацевтикалык компаниялар алып келип, баасын өздөрү эле коюп, тендерге киргизип сатышчу. Азыр "Кыргыз фармация" өндүргөн заводдор менен келишимди өздөрү түзөт. Заводдон алынган баага жол кире, иштегендердин айлык чыгымын жабуу үчүн 5 пайыз гана кошобуз", — деген Бейшеналиев. Ал кошумча нарк салыгы киргенден бери дарылардын баасы өсүүдө деп айтып жатышканын, бирок бюджетке дагы акча түшүп турушу керектигине токтолгон.
Тогуз-Торо районундагы Мойдунов атындагы мектеп "Жылдын мыкты мектеби" аталып, 300 мин сом менен сыйланды. Билим берүү министрлигинин билдиришинче буга чейин министрлик ар бир жаранды “Өз мектебиңди колдо!” хештеги менен челленджге катышууга чакырып, мыкты мектеп тандоого бул демилге да жардам берген. “Кыргызстандын мыкты мектеби” тандоосуна 122 мектеп катышып, бардыгы Ыраазычылык кат менен сыйланган. Сынак республикадагы мыкты мектептердин алдыңкы иш тажрыйбасынын үлгүлөрүн, мыкты билим берүү жана башкаруу көндүмдөрүн аймактарда жайгашкан мектептерге жеткирүү жана жайылтуу максатында уюштурулган.
Евразия өкмөттөр аралык кеңеши ЕАЭБ мамлекеттеринин 2024-2026-жылдарга карата транспорттун жол картасын бекитти. Бул тууралуу Евразиялык экономикалык комиссия билдирди. "Документке Еревандагы бүгүнкү жыйында кол коюлган. Ал буга чейинки 2018-2020 жана 2021-2023-жылдардагы жол карталардын уландысы болуп саналат. Документке ЕАЭБ мамлекеттеринин Чыгыш — Батыш жана Түндүк — Түштүк багыттары боюнча транспорттук инфраструктурасынын кууш жерлеринин тизмеси жана аларды жоюу жолдору кирди", — деп айтылат маалыматта. Өкмөт башчылары комиссияга жана тиешелүү тараптарга транспорттук интеграциянын бир катар маанилүү багыттары боюнча консультацияларды улантууга тапшырма беришкен.
Иран Израилдин аскердик объектилерине гана чабуул жасады. Бул туурасында БУУдагы Иран миссиясы билдирген. Бириккен Улуттар Уюмунун Коопсуздук кеңеши Жакынкы Чыгыш боюнча бүгүн кечинде чукул жыйын өткөрөт. Эске салсак, түндө бул мамлекет Израилге абадан ракеталык сокку жасаган. Иран 200дөй баллистикалык ракета кое бергенин айткан. Ирандын Куралдуу күчтөрүнүн башкы штабынын жетекчиси Израилдин Аскердик-аба күчтөрүнүн эки базасына жана "Моссад" чалгындоо кызматынын штаб-квартирасына сокку урулганын билдирди. Ирандын Куралдуу күчтөрүнүн башкы штабынын билдирүүсүндө Израилдин өнөктөштөрү аларга кол салса абал ого бетер чаташары белгиленген. Ал эми чабуулга тушуккан Израиль Ирандын аба соккуларынан келтирилген зыян көп эместигин, өлкөнүн Аскердик-аба күчтөрү жабыркабагандыгын кабарлады. “Уол стрит журнал” басылмасы Израиль соккуларды жоопсуз калтырбастыгын жана Ирандын өзөктүк жана мунай объектилерине кол саларын жазды. Бул кырдаалдан кийин Иран, Израиль жана Ирактын аба айдыңы жабылып, ал эл аралык авиакаттамдарга таасирин тийгизди.