Кыргызстан ЕАЭБ өлкөлөрүнө медициналык маалыматтарды алмашуунун бирдиктүү системасын киргизүүнү сунуштайт. Бул туурасында министрлер кабинетинин төрагасы Акылбек Жапаров Еревандагы Евразиялык III форумда сүйлөп жатканда белгиледи. "Биздин Биримдиктин алкагындагы миграциялык процесстердин маанилүү экенин айтпай коё албайм. Кыргызстандын президенти тарабынан сунушталган демилгелердин бири – эмгекчилерди медициналык кароодон өткөрүүнүн жыйынтыгын таануу системасын иштеп чыгуу. Бул учурда өлкөгө келгенден кийин кайра ушундай процедуралардан өтүүгө аргасыз болгон мигранттардын каржылык жана убакыт чыгымдарын бир топ кыскартат", — деди ал. Өкмөт башчы заманбап санариптик технологиялар ЕАЭБ өлкөлөрүнүн ортосунда медициналык маалыматтарды алмашуунун бирдиктүү системасын түзүүгө мүмкүндүк берерин белгиледи.
Кыргызстанда "Жылдын мыкты мугалими" жана "Жылдын мыкты тарбиячысы" сынагы башталды. Бул тууралуу Билим берүү жана илим министрлиги билдирди. Бул — чоң байге коюлган жана мугалимдер масштабдуу түрдө катышкан алгачкы сынак. Биринчи орун алган мугалимге Бишкектен батирдин ачкычы тапшырылат. Сынактын максаты — башталгыч, негизги, жалпы орто билим берүү уюмдарынын мамлекеттик жана муниципалдык жогорку кесипкөй кадрдык курамын түзүү. Ошондой эле натыйжалуу практикага ээ таланттуу, чыгармачыл педагогдорду аныктоо болуп саналат. Иш-чара Кара-Кыргыз автономиялуу облусунун түзүлгөндүгүнүн жана билим берүү системасынын 100 жылдык мааракесинин алкагында өтүп, 5-октябрга чейин созулат.
Төрөттөн кийин дароо эле спортко аралашуу көп учурда ден соолукка зыян алып келиши мүмкүн. Бул тууралуу гинеколог-эндокринолог Юлия Янчевская "Доктор Питер" басылмасына берген маегинде билдирди. Адистин айтымында, аял алгач дарыгердин кеңешин алып, керектүү медициналык текшерүүлөрдөн өтүшү зарыл. "Кыз-келиндер биринчи кезекте акушер-гинекологдун көзөмөлүндө болушу шарт. Организм төрөттөн кийинки 42 күн ичинде "өзүнө келе баштайт". Мындан тышкары, гормондор, аялдын психоэмоционалдык абалы дагы өзгөрөт. Кош бойлуу мезгилде өзгөргөн организм болжол менен 6-10 айда калыбына келет", — деп билдирген Янчевская. Дарыгер өзү төрөгөн аялдарга кеминде 1,5 ай, операция жолу менен төрөгөндөргө кеминде 2 айга чейин бассейн, көл, баня, саунага барганга жана спорт менен активдүү машыгууга болбой турганын эскерткен.
Россиянын аскерлери Донецкидеги операцияда өтө тездик менен алдыга жылууда. Бул тууралуу Пентагондун башчысынын эл аралык коопсуздук боюнча мурдагы жардамчысы Час Фриман Dialogue Works YouTube каналындагы маегинде билдирген. "Эгер Донецк облусунда болуп жаткан окуяларды карай турган болсок, орустар бул жаңжалда болуп көрбөгөндөй ылдамдыкта илгерилеп жатканын көрөбүз", — деди ал. Эксперттин айтымында, фронттун кыйрап жатканын украин маалымат каражаттары да моюнга ала баштады. "Сүйлөшүү столунда отургандар согуш талаасында жоготкондорун кайтарып алган учур болгон эмес. Ошондуктан сүйлөшүүлөр жүрүшү керек жана ал Россия койгон шарттардын