БИШКЕК, 30-сен. — Sputnik. Учурда Израилде Кыргызстандын 100гө жакын жараны бар. Бул тууралуу Sputnik Кыргызстан агенттигине Тышкы иштер министрлиги билдирди.
Маалыматка караганда, өлкөнүн Түркиядагы элчилиги алар менен байланышта болуп, бардык керектүү жардамды көрсөтүп жатат.
"Биз Израилде, Палестинада, Ливанда эмне болуп жатканына көз салуудабыз. Министрликтин ишмердүүлүгүнүн негизги багыттарынын бири — чет өлкөдөгү кыргызстандыктардын кызыкчылыктарын коргоо", — деди маалымат кызматы.
Кувейттеги элчилик Ливандагы кыргызстандыктар менен байланышта экени белгиленди.
"Ливанда 10 кыргызстандык бар. Алар элчиликке кайрылышып, каттоого турушту. Кайрыла элек дагы канча адам бар экенин билбейбиз. Каттоого тургандардын баарынын балдары бар. Эгер бала Ливанда төрөлсө дароо ошол өлкөнүн жараны болуп эсептелет. Ошондуктан так санын айта албайбыз. Учурда бул багытта иштер жүрүп жатат", — деди ТИМ.
Буга чейин Тышкы иштер министрлиги бул өлкөлөрдүн чек арасындагы чыңалган кырдаалга байланыштуу кыргызстандыктарга Израиль менен Ливанга баруудан баш тартууну сунуштаган. Кыргызстандыктарга коопсуздук чараларын күчөтүү же мүмкүн болсо кырдаал турукташканга чейин бул өлкөлөрдөн чыгып кетүү эскертилди.
Аталган мамлекеттерде жүргөн Кыргызстандын жарандары өлкөнүн Кувейттеги +96525359951, Түркиядагы +905456896800 элчиликтеринин ишеним телефондорунан, ошондой эле Тышкы иштер министрлигинин Консулдук департаментинен +996 999312002 кеңеш ала алат.